Qazaqstanda temir jol kóliginde qaýipsizdik erejesin buzý jaǵdaılary 10 paıyzǵa tómendedi
ASTANA. QazAqparat - 2015 jyldyń 8 aıynda temir jol kóligi salasynda baqylaý-qadaǵalaý qyzmeti boıynsha tehnıkalyq jaǵdaıy sáıkes kelmeýi sebebinen 241 birlik jyljymaly quram (onyń ishinde 26 lokomotıv, 215 vagon) paıdalanýdan toqtatyldy. Sonymen qatar 168 stantsıondy jáne kirme joldary men baǵyttamalyq ótpeler jabyldy.
Bul týraly QR IDM baspasóz qyzmetinen habarlandy.
«Jalpy qozǵalys qaýipsizdigi boıynsha oń qarqyn baıqalýda. Qozǵalys qaýipsizdigi buzýshylyqtarynyń sany 2014 jylmen salystyrǵanda 44 jaǵdaıǵa nemese 9,3 paıyzǵa azaıdy. Atap aıtqanda bıyl 425 oqıǵa tirkelse, 2014 jyldyń sáıkes kezeńinde 469 jaǵdaı oryn alǵan bolatyn»,-deıdi mınıstrliktegiler.
Budan bólek, sý kóligindegi baqylaý salasynda kemelermen bolǵan apattyq jaǵdaılar ótken jylǵy kórsetkishtermen salystyrǵanda 11-den 5-ke deıin kemidi.
Sonymen qatar, 2015 jyldyń 8 aıy boıynsha avtokólik quraldarynan túsken alym 2,5 mlrd. teńgeni qurady. 9 097 kóliktik zańnamany buzýshylyq anyqtaldy.
