Qazaqstanda temekige qatysty qandaı shekteýler bolady

ASTANA. QazAqparat - «Atameken» UKP «Halyq densaýlyǵy jáne densaýlyq saqtaý júıesi týraly» jańa kodekstiń jobasyn qoǵamdyq talqylaýǵa shyǵardy, dep habarlaıdy QazAqparat tilshisi.

Atap aıtqanda, kodekste bilim mekemelerinen 100 metr qashyqtyqta temeki ónimderin satýǵa tyıym salynǵan. Budan bólek, temeki ónimderin sórege qoıýǵa bolmaıdy. Al shaǵyn saýda oryndary (aýdany 10 sharshy metrge deıingi) temekini múldem sata almaıdy.

Qazaqstannyń alkogol jáne temeki ónimderin óndirýshiler qaýymdastyǵynyń prezıdenti Ámirjan Qalıevtiń aıtýynsha, kodekske engizilgen shekteýler tym qatty. Sonyń saldarynan jasyryn saýda kúsheıip, sybaılas jemqorlyq áreketteri kóbeıedi.

«Esterińizde bolsa, 100 metrlik qashyqtyqta alkogol ónimderin de satýǵa tyıym salynǵan bolatyn. Biraq atalǵan norma óz nátıjesin bermedi. Sol sebepti ony alyp tastady. Saýda oryndarynyń aýdanyna qaraı temeki satýǵa tyıym salý máselesi de bar. Jalpy, biz qarsy emespiz. Biraq bunyń barlyǵyn bir ýaqytta iske asyrý qıyn. Atalǵan sharalardy birtindep júzege asyrý qajet. Áıtpese, zańsyz saýda kúsheıip ketedi, kontrafaktilik ónimder de keń taralýy ábden múmkin. Sosyn kodeks boıynsha qoǵamdyq jerlerde temeki shegýge tyıym salý josparlanǵan. Qazirgi kezde biz osy máseleni pysyqtap jatyrmyz», - dedi Á.Qalıev jýrnalısterge bergen suhbatynda.

«Atameken» UKP taratqan aqparatqa sáıkes, 10 sharshy metrge jetpeıtin shaǵyn dúkenderge temeki ónimderin satýǵa tyıym salsa, myńdaǵan saýda oryndary bankrotqa ushyraıdy. Sebebi, olarǵa tıesili tabystyń 30-40 protsenti temekiden túsedi. Al «100 metrlik shekteý» respýblıka boıynsha saýda oryndarynyń 80 protsentin, naqty aıtqanda, 49 000 shaǵyn jáne orta bıznes ókilderin shyǵynǵa batyrady.