Qazaqstanda temeki shegetinderdiń sany belgili boldy

ASTANA. QazAqparat - Qazaqstanda temeki tutyný týraly turǵyndar arasynda alǵashqy Ǵalamdyq saýalnama (GATS) júrgizildi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde QR Densaýlyq saqtaý mınıstrligi Salaýatty ómir saltyn qalyptastyrý ulttyq ortalyǵynyń dırektory Jámıla Battaqova málim etti.

"GATS zertteýi eresek turǵyndar arasynda temeki tutyný jáne oǵan baqylaý jasaý jóninde jalpyulttyq irikteý málimetterin alýǵa baǵyttalǵan. Barlyǵy 4425 adam saýalnamaǵa qatysty. Olardyń ishinde 2085-i - erler, 2340-y - áıelder. Zertteý nátıjesi boıynsha erlerdiń 42,4 paıyzy temeki shegedi, al áıelderdiń úlesi birshama tómendeý - 4,5 paıyz. Jalpy Qazaqstan halqynyń 22,4 paıyzy nemese 2,8 mıllıon adam temeki ónimderin tutynady", - dedi ol.

Taǵy bir qyzyǵy temekini úzbeı shegýshi 10 adamnyń ishinde tek bireýi temeki shegýden bas tarta alǵan. Al olardyń altaýy shylym shegýdi tastaýdy josparlap otyr. Degenmen ol árkimniń qolynan kele bermeıdi. Temeki shegýshi 10 adamnyń 3-eýi sońǵy 12 aıda shylymnan bas tartyp kórmek bolǵan.

Aıta keteıik, Qazaqstan 2004 jyly DDU Temekige qarsy kúres jónindegi negizdemelik konventsııasyna qosyldy. Qazaqstanǵa deıin GATS temeki tutyný kórsetkishi joǵary álemniń 19 elinde ótkizildi. DDU málimetterine sáıkes, álem boıynsha jyl saıyn 6 mln. jýyq adam temekniń zardabynan kóz jumady.