Qazaqstanda temeki men benzın aktsızderi qymbattady

NUR-SULTAN. QazAqparat – 1 qańtardan bastap Qazaqstan temekige aktsız mólsherlemesin kóterdi, dep habarlaıdy QazAqparat.

QR Qarjy mınıstrligi kásipkerliktiń jekelegen túrlerine salyq salý basqarmasynyń basshysy Gúlmıra Smaǵulovanyń aıtýynsha, Salyq kodeksiniń 463-baby 4-tarmaǵyna sáıkes, 2020 jyldyń 1 qańtarynan bastap temekige aktsız mólsherlemesi 13,8%-ǵa kóterilgen.

«2019 jyly myń dana temeki 8700 teńge bolsa, qazir ol 9000 teńgeni quraıdy. Temeki ónimderine aktsız stavkalaryn kóterý 2006 jylǵy 25 qarashadaǵy QR Zańymen bekitilgen Temekige qarsy kúres týraly konventsııany oryndaý úshin qajet», - dedi G. Smaǵulova elordada Salyq zańnamasyn túsindirý týraly semınarda.

Sonymen birge, basqarma basshysy benzın aktsızderiniń de qymbattaǵanyn eske saldy.

«2020 jyldyń 1 qańtarynan bastap aktsız óndirýshilerge 1 tonna benzınniń kóterme satylymy úshin 24 435 teńge, bólshek saýdadaǵy satylymy úshin – óndiristik qajettilikterge 24 935 teńge (1 tonna), ımporttaý kezinde 1 tonna benzın úshin 24 435 teńge bolmaq. Salyq kodeksiniń 462-baby 5-tarmaqshasynda kórsetilgen, shıkizatty qaıta óńdeý ónimi bolyp tabylatyn aktsızdeletin taýarlardy bergende 1 tonnaǵa 24 245 teńge belgilengen», - dedi G. Smaǵulova.