Qazaqstanda temeki shegetinderdiń úlesi 15 paıyzǵa deıin tómendedi
ASTANA. KAZINFORM – Qazaqstanda temeki ónimderin óndirý kólemi aıtarlyqtaı artqanymen, temeki shegetinderdiń úlesi azaıyp keledi, dep habarlaıdy Energyprom.kz saıty.
Osy jyldyń qańtar–maýsym aılarynda elimizde 14,2 mlrd dana sıgara, cherýt, sıgarılla, temeki jáne papıros shyǵaryldy. Bul ótken jyldyń sáıkes kezeńimen salystyrǵanda 35,2%-ǵa kóp.
Salystyrmaly túrde alǵanda, 2024 jyldyń alǵashqy alty aıynda óndiris kólemi 7,6 mlrd dana bolsa, 2025 jyly 10,5 mlrd danaǵa jetken. Al 2016 jyldyń sáıkes kezeńimen salystyrǵanda ónim shyǵarý kólemi 69%-ǵa ósti.
2026 jyldyń qańtar–mamyr aılarynda qazaqstandyq kásiporyndar temeki men papırosqa degen suranystyń (ishki naryqtaǵy ótkizý men eksportty qosa eseptegende) 89,9%-yn qamtamasyz etti. Bir jyl buryn bul kórsetkish 73,5% bolǵan.
Osy kezeńde óndiris kólemi 33,4%-ǵa ósip, 11,2 mlrd danaǵa jetse, ımport 58,4%-ǵa qysqaryp, 1,3 mlrd danany qurady. Nátıjesinde ımporttyq ónimniń úlesi 26,5%-dan 10,1%-ǵa deıin tómendedi.
Temeki ónimderiniń basym bóligi eksportqa jóneltildi. Qańtar–mamyr aılarynda shetelge 6,7 mlrd dana temeki men papıros shyǵarylyp, eksport kólemi bir jylda 3,7 esege artty. Al ishki naryqtaǵy satý kólemi 39,9%-ǵa azaıyp, 5,8 mlrd danany qurady.
Óndiristiń artýyna qaramastan, eldegi temeki shegýshilerdiń úlesi tómendep keledi. 2026 jyly 15 jastan asqan qazaqstandyqtardyń 15,1%-y temeki shegedi. Bul kórsetkish 2025 jyly 17,5%, 2024 jyly 20,7%, al 2023 jyly 19,4% bolǵan.
Elektrondy temeki paıdalanatyndardyń úlesi bir jylda 0,5%-dan 0,4%-ǵa deıin azaıdy. Al IQOS jáne glo sekildi temekini qyzdyrý júıelerin qoldanatyndardyń úlesi 1,2%-dan 0,9%-ǵa tómendedi.
Bul málimetter Qazaqstannyń barlyq óńirindegi 12 myń úı sharýashylyǵyn qamtyǵan iriktemeli zertteý nátıjesinde alynǵan. Zertteý barysynda árbir úı sharýashylyǵynan 15 jastan asqan bir adam saýalnamaǵa qatysqan.
2026 jyly erlerdiń 30,5%-y, áıelderdiń 4,9%-y temeki shegedi. Bir jyl buryn bul kórsetkish tıisinshe 34% jáne 5%, al 2024 jyly 39,8% jáne 7,6% bolǵan.
Elektrondy temekini 2026 jyly erlerdiń 0,5%-y, áıelderdiń 0,3%-y paıdalanady. IQOS jáne glo sııaqty temekini qyzdyrý júıelerin erlerdiń 1,3%-y, áıelderdiń 0,6%-y qoldanady. Bul kórsetkishter de ótken jylmen salystyrǵanda tómendegen.
Eske sala ketsek, buǵan deıin Atyraýda zańsyz aınalymnan 11 myńnan astam qorap temeki tárkilendi.
Al elimizde halyqtyń qansha paıyzy temeki shegetini belgili boldy.
