Qazaqstanda temeki baǵasy ósýi múmkin
ASTANA. KAZINFORM – Qazaqstannyń Qarjy mınıstrligi temeki ónimderiniń eń tómengi bólshek saýda baǵasyn kóterýdi kózdeıtin buıryq jobasyn ázirledi.
Atalǵan ózgerister súzgisi bar jáne súzgisiz temekilerge, papırostarǵa, sıgarıllalarǵa, sondaı-aq qyzdyrylatyn temeki ónimderine qatysty bolady.
Vedomstvonyń málimetinshe, temeki ónimderine eń tómengi baǵalardy qaıta qaraý temekige qatysty teńgerimdi salyq jáne baǵa saıasatyn iske asyrý úshin qajet. Sonymen birge, bul shara densaýlyq saqtaý salasyndaǵy memlekettik saıasat aıasynda temeki ónimderin tutynýdy azaıtýǵa baǵyttalǵan.
Qujatty ázirleýshilerdiń pikirinshe, eń tómengi bólshek saýda baǵasynyń ósýi bıýdjetke túsimderdi arttyrýǵa jáne temeki ónimderiniń kóleńkeli aınalymyn qysqartýǵa múmkindik beredi.
Buıryq jobasy Qazaqstannyń temeki ónimderin óndirý men olardyń aınalymyn memlekettik retteý týraly zańnamasyna, sondaı-aq eldiń temeki shegýge qarsy kúres jónindegi halyqaralyq mindettemelerine sáıkes ázirlengen.
Túsindirme jazbada qujatty qabyldaý áleýmettik-ekonomıkalyq jáne quqyqtyq jaǵdaıǵa teris áser etpeıtini kórsetilgen.
Qazirgi ýaqytta buıryq jobasy «Ashyq NQA» portalynda jarııalanyp, qoǵamdyq talqylaýǵa shyǵaryldy. Talqylaý 2026 jylǵy 20 shildege deıin jalǵasady.
