Qazaqstanda telekommýnıkatsııalar naryǵynyń kirisi 2011 jyly 18,7 paıyzǵa ósti - Asylbek Haırýshev
ALMATY. 29 mamyr. QazAqparat - Telekommýnıkatsııalar naryǵyndaǵy kásiporyndardyń jıyntyq kirisi 2011 jyly Qazaqstanda 555,9 mıllıard teńgeni qurady.
Bul aldyńǵy jylmen salystyrǵanda 18,7 paıyzǵa joǵary. Bul jaıly Qazaqstannyń ulttyq telekommýnıkatsııalar qaýymdastyǵynyń prezıdenti Asylbek Haırýshev búgin Almatyda telekom aptasy aıasynda ótip jatqan Kitel'12konferentsııasynda aıtty.
Kólik jáne kommýnıkatsııa mınıstrliginiń málimeti boıynsha 2011 jyly mobıldi baılanys abonentteriniń sany 23 mıllıon 102 myńdy qurap, 100 adamǵa shaqqanda tyǵyzdyǵy 141,5 boldy. Al tirkelgen baılanys abonomentteriniń sany 4 mıllıon 237 myńdy qurap, tyǵyzdyǵy 100 adamǵa shaqqanda 25,9-dy qurady. Telekommýnıkatsııa jelilerin tsıfrlaý 2011 jyly 94,8 paıyz kóleminde boldy. Internet jelisin qoldanýshylar sany 8 mıllıon 715 myń adam bolyp, 100 adamǵa shaqqanda tyǵyzdyq 53,4-ti qurady. Al keń jıekti ınternetke qoljetimdilik 6 mıllıon 775 myń nemese tyǵyzdyǵy 100 turǵynǵa bólgende 41,5 boldy.
«Halyqqa baılanys qyzmetin usynýdy júzege asyrýdan túsken kiristiń 54,2 paıyzy - mobıldi baılanys, 15,1 paıyzy - ınternet qyzmeti; 8,1 paıyzy - halyqaralyq baılanys; 7,1 paıyzy - jergilikti telefon baılanysy jáne 11,1 paıyzy ózge baılanys túrlerinde. Keń jıekti ınternet jelisine qoljetimdilik. Bul Qazaqstanda aqparattyq kommýnıkatsııalyq tehnologııalar mene ekonomıkanyń shıkizattyq emes sektorynda jáne onyń ishinde shaǵyn jáne orta bızneste ósýdiń katalızatory retinde qarastyrylýda.», - deıdi A.Haırýshev. Onyń aıtýynsha, tehnolorgııalar boıynsha keń jıekti ınternet jelisine qoljetimdiliktiń abonentter bazasynyń qurylymynda ADSL: 91,5 paıyzdy, FTTx: 7,3 paıyzdy, WiMAX - 1,0 paıyzdy, Satellite 0.3 paıyzdy quraıdy. El aýmaǵynda uıaly baılanysty3G standarty Astana, Almaty qalalary men barlyq oblys ortalyqtarynda engizildi.
