Qazaqstanda Telegram-nyń buǵattalýyna múddeli emespiz – Dáýren Abaev
«Eń birinshi kezekte, Aqparat jáne kommýnıkatsııalar mınıstrligi sot sheshimin oryndaý úshin barlyq qajetti sharalardy qabyldaýǵa mindetti. Osyǵan baılanysty tıisti eskertýler jiberildi, sonyń ishinde Telegram ákimshisine de. Bul baǵytta jumys júrgizilip jatyr. Qazaqstanda qoldanysy keńeıip kele jatqan Telegram syndy messendjerdiń buǵattalýyna múddeli emespiz», - dedi Dáýren Abaev.
Eske sala ketsek, mınıstr Telegram jelisiniń buǵattalý yqtımaldylyǵyna qatysty budan buryn da pikir bildirgen bolatyn.
«Buǵattaý - bul quqyqqa qarsy kontenttiń taratylýymen kúres júrgizýde memlekettiń eń sońǵy sharasy ekenin túsiný kerek. Degenmen, ol messendjerdiń ákimshiligi bizdiń eskertýimizdi elemegen jaǵdaıda ǵana iske asyrylady. Onymen bir mezgilde, Telegram ákimshiliginiń tarapy bizdiń talaptarǵa túsinistikpen qarap, jekelegen paraqshalardy joıyp jatqanyn qazirdiń ózinde kórip otyrmyz. Sondyqtan, messendjerdi buǵattaý týraly BAQ-taǵy shýly aqparattar shyndyqtan alystaý», - degen edi Dáýren Abaev «QazAqparat» HAA tilshisine.
Eske sala ketsek, budan buryn Pavlodar qalasynyń turǵyny mınıstrliktiń blogyna shaǵymyn joldap, óziniń Telegram-kanalyn Qazaqstanda ekstremıstik uıym retinde tanylǵan - Qazaqstannyń demokratııalyq tańdaýy tobyna ruqsatsyz qosqanyn aıtqan bolatyn.
