Qazaqstanda telefondardyń IMEI kodyn tekseretin jańa operator paıda boldy

ASTANA. KAZINFORM — «Qazaqstanda taǵy bir kompanııa telefondardyń IMEI kodtaryn tekserý qyzmetin júrgizýge ótinish berdi. Onyń tarıfterin memleket retteıtin bolady. Bul qyzmetti «Memlekettik radıojıilik qyzmeti» RMK kórsetedi», dep habarlaıdy Kazinform.

Qazaqstan Respýblıkasynyń Jasandy ıntellekt jáne tsıfrlyq damý mınıstrligi IMEI-verıfıkatsııa operatoryna jańa kandıdatýra usynylǵanyn rastady.

— Qazirgi ýaqytta verıfıkatsııa qyzmetin kórsetýge ekinshi kompanııa ótinish berdi. Bolashaqta «Memlekettik radıojıilik qyzmeti» RMK qurylǵylardy verıfıkatsııalaýdy óz betinshe júrgizedi, — deıdi BAQ jáne qoǵammen baılanys basqarmasynyń basshysy Aınur Álmuhanova.

Kompanııa qyzmet kórsetý tarıfteri boıynsha jalǵyz operator bolmaq. Al tarıfterdi Básekelestikti qorǵaý jáne damytý agenttigi retteıdi. Sondaı-aq, mınıstrlik naryqta birneshe operator paıda bolatynynan úmitti. Bul qyzmet kórsetý sapasyn arttyrýǵa jáne olqylyqtardyń aldyn alýǵa múmkindik beredi.

— Basqa operatorlardyń tarıfteri básekelestik shartymen belgilenedi, bul naryqta ádil jáne tıimdi básekeniń damýyna múmkindik beredi, — dep túsindirdi JI mınıstrligi.

Qazirgi ýaqytta Qazaqstanda IMEI-verıfıkatsııasyn tek «ATS Mediafon KZ» JShS júzege asyrady. Operator ashyq konkýrs qorytyndysy boıynsha tańdalǵan.

Degenmen, Tsıfrlyq damý mınıstrligi naryqty shektemeıtinin jáne qyzmet operatorlary bolǵysy keletin basqa kompanııalardan da ótinishter kútetinin aıtty. Kandıdattar óz júıesin memlekettik derektermen biriktirip, barlyq qurylǵylardy durys teksere alatyndaı múmkindikke ıe bolýy kerek.

Aıta keteıik, Qazaqstanǵa ákelinetin barlyq jańa qurylǵylar verıfıkatsııadan ótýi qajet. Tirkelmegen qurylǵylar «qara tizimge» engizilip, el aýmaǵynda uıaly baılanys qyzmetteri toqtatylady.

Buǵan deıin Qazaqstanda baılanys qyzmetterin kórsetý qaǵıdalaryna ózgerister engizilgeni týraly habarlaǵan edik.