Qazaqstanda «telefon lańkesterine» jaza qatańdatyldy
Endi quqyq buzýshylar 7 jylǵa deıin bas bostandyqtarynan shektelýi múmkin. Bul týraly búgin Joǵarǵy Sotta ótken aptalyq brıfıngte vedomstvonyń resmı ókili Oksana Peters málim etti.
«2012 jyly 18 qańtarda QR Qylmystyq Kodeksine ózgerister engizilip, 242 bappen sanktsııa berý tártibi qataıtyldy», - deıdi ol.
O. Peterstiń aıtýynsha, buryn lańkestik týraly ádeıi jalǵan aqparat berý 200-den 500 aılyq eseptik kórsetkishke deıin nemese sottalýshynyń jalaqysy kóleminde nemese eki aıdan bes aıǵa deıingi ózge tabysy kóleminde aıyppul tóleýmen jazalanatyn. Bolmasa quqyq buzýshy bir jyldan eki jylǵa deıin túzeý jumystaryn atqarýmen shekteletin. Keı jaǵdaılarda 2 jylǵa deıin bas bostandyqtan aıyrý jazasy taǵaıyndalyp keldi.
«Endi QR QK-nyń 242-babyna ózgeristerdiń engizilýine baılanysty lańkestik aktisi týraly ádeıi jalǵan aqparat berý 200-den 500 aılyq eseptik kórsetkishke deıin aıyppul tóleý, 7 jylǵa deıin bas bostandyǵynan shekteý nemese 6 jylǵa deıin bas bostandyqtan aıyrý jazasy taǵaıyndalady», - dep atap ótti. ol.
Joǵarǵy Sot málimetterine qaraǵanda, «telefon lańkesteriniń» áreketteri sońǵy jyldary artyp keledi. 2010 jyly 18 adam atalmysh fakt boıynsha isti bolsa, 2011 jyly olardyń sany 27 paıyzǵa artyp, 23 adamdy qurady.
