Qazaqstanda telefon alaıaqtyǵyna qarsy JI engizilip jatyr
ASTANA. KAZINFORM- «Qazaqtelekom» AQ telefon alaıaqtyǵyna qarsy kúres aıasynda jasandy ıntellekt (JI) tehnologııalaryn engizip jatyr. Bul týraly kompanııa basqarma tóraǵasy Baǵdat Mýsın «Samuryq-Qazyna» AQ Qoǵamdyq keńesiniń otyrysynda málim etti.
Onyń aıtýynsha, alaıaqtyq qońyraýlarǵa qarsy arnaıy baǵdarlamalyq qamtamasyz etý engizilgen. Ol kúmándi qońyraýlardy anyqtap, tıisti koll-ortalyqtarǵa baǵyttaıdy. Bul ortalyqtar Bas prokýratýramen birlesip qurylǵan.
– Biz mundaı qońyraýlardy anyqtap, arnaıy koll-ortalyqtarǵa jiberemiz. Qazirgi tańda osyndaı qońyraýlardyń shamamen 6%-yn toqtatyp otyrmyz. Al 100% qamtý úshin qýatymyzdy shamamen 20 esege arttyrý qajet. Sondyqtan operatorlar sanyn geometrııalyq progressııamen kóbeıtpeı, máseleni tıimdi sheshý úshin JI modelderin ázirleýdemiz. Bolashaqta olar qońyraýlardy avtomatty túrde óńdep, azamattardy alaıaqtardan qorǵaýdy qamtamasyz etedi, – dedi Baǵdat Mýsın.
Ol telefon alaıaqtyǵyna qarsy kúres turaqty jumysty talap etetinin atap ótti. Sebebi qaskóıler qorǵanys tehnologııalaryna tez beıimdeledi.
Sonymen qatar bul baǵyttaǵy jumys Bas prokýratýra jáne Ulttyq bank janyndaǵy Antıfrod-ortalyqpen úılestirilip júrgizilip jatyr. Prezıdent tapsyrmasy aıasynda vedomstvoaralyq ózara is-qımyl jolǵa qoıylǵan.
– Biz tek usynystar ázirlep qana qoımaı, naqty sharalardy júzege asyryp jatyrmyz. Atap aıtqanda, telekommýnıkatsııa jelilerinde azamattardy alaıaqtyq qońyraýlardan qorǵaıtyn arnaıy baǵdarlamalardy engizýdemiz, – dep tolyqtyrdy Baǵdat Mýsın.
Sonymen qatar «Qazaqtelekomnyń» byltyrǵy tabysy týraly aqparatty silteme arqyly oqýǵa bolady.
