Qazaqstanda teledıdar óndirisi jarty jylda úsh esege jýyq ósti
ASTANA. KAZINFORM – Elimizde sońǵy jyldarda teledıdar óndirisiniń ósimi baıqalady. Bul jóninde Kazinform agenttigi energyprom.kz derekterine silteme jasaı otyryp, habarlaıdy.
2026 jyly qańtar-maýsym aılarynda otandyq kásiporyndar 112,9 myń teledıdar óndirgen. Bul ótken jyldyń sáıkes kezeńimen salystyrǵanda, 2,9 ese kóp.
Sonymen qatar, zertteýde bul 2015 jyldan beri jyldyń alǵashqy alty aıyndaǵy eń joǵary kórsetkish ekeni atap ótilgen. Degenmen, qazirgi óndiris kólemi ótken onjyldyqtyń basyndaǵy rekordtyq deńgeıden áli de aıtarlyqtaı tómen. Máselen, 2013 jyly Qazaqstanda 580 myńǵa jýyq teledıdar shyǵarylǵan bolatyn.
Rekordtyq kórsetkishten keıin salada quldyraý bastaldy. 2021–2023 jyldary jyl saıyn nebári 9–12 myń teledıdar ǵana óndirildi. Buǵan ımporttyq ónimdermen básekeniń kúsheıýi, bólshekter qunynyń qymbattaýy jáne birqatar otandyq óndirýshilerdiń jumysyn toqtatýy sebep boldy.
2024 jyldan sala qaıta jandana bastaldy. Sol jyly óndiris kólemi 4,6 esege ósip, 43,5 myń danaǵa jetti. Al 2025 jyly óndiris taǵy 3,1 esege artyp, statıstıka 134,9 myń teledıdar boldy. Mundaı ósimge Almatyda Xiaomi teledıdarlaryn, al Qaraǵandy oblysynyń Saran qalasynda Samsung teledıdarlaryn qurastyratyn jańa óndiris oryndarynyń iske qosylýy áser etti.
Sonymen birge, ishki naryqtyń ımportqa táýeldiligi birtindep tómendep kele jatyr. 2026 jyly qańtar-mamyr aılarynda otandyq ónimniń suranysty qamtamasyz etýdegi úlesi 2,7%-dan 18,2%-ǵa ósti. Osy kezeńde óndiris kólemi 3,2 esege artsa, al ımport 2,5 esege azaıyp, 440,1 myń dana boldy. Importtyq ónimniń úlesi 97,3%-dan 81,8%-ǵa deıin qysqaryp, 2015 jyldan bergi eń tómengi deńgeıge tústi.
Soǵan qaramastan, Qazaqstan naryǵynda teledıdarlardyń negizgi bóligi áli de ımport esebinen qamtamasyz etilip jatyr.
Alǵashqy bes aıdyń qorytyndysy boıynsha, teledıdarlardyń eksporty men reeksporty 2,7 esege ósip, 192,3 myń danaǵa jetti. Al ishki naryqtaǵy satylym 3,1 esege quldyrap, 345,9 myń dana tirkeldi.
Otandyq óndiris órkendegenmen, bólshek saýdadaǵy baǵalar ósip keledi. 2026 jyldyń maýsym aıynda teledıdar ótken jyldyń sáıkes aıymen salystyrǵanda, 37,5%-ǵa, al jyl basynan beri 15,8%-ǵa qymbattady.
Sarapshylardyń pikirinshe, buǵan Qazaqstanda ázirge negizinen teledıdarlardy qurastyrý óndirisi ǵana damyp jatqany áser etip otyr. Dıspleıler, protsessorlar jáne jad mıkroshemalary sııaqty negizgi bólshekter shetelden ımporttalatyndyqtan, tehnıka quny álemdik elektrondyq komponentter naryǵyndaǵy baǵaǵa, valıýta baǵamyna jáne logıstıkalyq shyǵyndarǵa táýeldi bolyp qala beredi. Sonymen qatar, jasandy ıntellekt ındýstrııasy men derekter ortalyqtary tarapynan jad mıkroshemalaryna suranystyń artýy da baǵanyń ósýine qosymsha yqpal etip jatyr.
Aıta keteıik, buǵan deıin Pavlodardaǵy dron óndirisi qalaı damyp jatqanyn jazǵanbyz.
