Qazaqstanda Tekserýler sýbektileri men obektileriniń biryńǵaı tizilimi daıarlandy

ASTANA. QazAqparat - Qazaqstanda Tekserýler sýbektileri men obektileriniń biryńǵaı tizilimi (TSOBT) daıarlandy. Bul týraly «Atameken» Ulttyq kásipkerler palatasynyń Kásipkerlerdi qorǵaý jónindegi keńesiniń otyrysynda QR Bas prokýratýrasy Quqyqtyq statıstıka jáne arnaıy esepke alý komıtetiniń tóraıymy Sáýle Aıtpaeva málim etti.

«Bizdiń komıtet jumysynda zańdylyq, tekserýler júrgizýdiń ashyqtyǵy, negizsiz tekserýlerdiń aldyn alý basymdyqty maqsattardyń biri bolyp tabylady. Osy baǵyttaǵy salany jetildirý boıynsha QR Prezıdentiniń, Bas prokýrordyń tapsyrmalaryna sáıkes jumystardy únemi jalǵastyrýdamyz. Barsha organdarmen aktilerdi tirkeýdiń elektrondy tártibine kóshtik. Onyń arqasynda bul úderisti aıtarlyqtaı ońtaılandyryp, ony kásipkerler men memlekettik organdar úshin barynsha ashyq ettik. Bıyldan bastap Komıtetke zańnamalyq túrde qadaǵalaý men baqylaý organdarynyń tekserýlerin úılestirý boıynsha ókilettiligi berildi. Osy ókilettilikti júzege asyrý aıasynda biz qazirgi zamanǵy tehnologııalardy engizýdi jalǵastyryp, Tekserýler sýbektileri men obektileriniń biryńǵaı tizilimin ázirledik», -dedi S. Aıtpaeva.

Osy oraıda ol bul júıe teserýler nysandary boıynsha tolyq aqparatty qamtıtyndyǵyn atap ótti. Endi tekseris sýbektileri men obektilerin, olardyń táýekel dárejeleriniń deńgeıi, buryn júrgizilgen tekseristerdiń tarıhy men nátıjeleri týraly málimetti qamtıyn biryńǵaı aqparattyq júıe bolady. Táýekel dárejesin baǵalaý júıelerimen jumys jasaý úderisterin avtomattandyrý TSOBT-nyń negizgi isi bolady.

«Sonymen qatar «Tekserýler kartasyn» qurýda mańyzdy nátıje bolmaq. Onda júrgizilgen tekserýler men kásipkerler jol bergen zań buzýshylyqtar týraly málimetter qamtylady. Bul aqparattar ınternet-resýrsta qoljetimdi bolady. Tutynýshylar úshin kásipkerler jumysyn baǵalaýdyń osyndaı qoljetimdigi qyzmet pen jumys sapasyn arttyrýdy yntalandyrady»,-dedi komıtet basshysy.