Qazaqstanda tek sheteldikterge ǵana arnalǵan kazınolar qashan ashylady
ASTANA. KAZINFORM — Keler jyly Mańǵystaý jáne Almaty oblystarynda eki jańa kazıno paıda bolýy múmkin. Bul týraly QR Týrızm jáne sport mınıstri Erbol Myrzabosynov málim etti.
Mınıstrdiń aıtýynsha, qazir jergilikti atqarýshy organdarmen birlese jańa oıyn aımaqtarynyń alańdaryn anyqtaý jumystary, sondaı-aq áleýetti ınvestorlardy irikteý boıynsha kelissóz júrip jatyr.
— Ázirge, Almaty oblysynda bastapqy jumystar aıqyndaldy. Tıisti ınfraqurylym tartyldy. Al qalǵan óńirler boıynsha kelissóz jalǵasady, — dedi E. Myrzabosynov Úkimet otyrysynan keıin Kazinform tilshisine bergen jaýabynda.
Sonymen qatar ol Almaty oblysyndaǵy nysan keler jyly iske qosylýy múmkin ekenin naqtylady.
— Mańǵystaý oblysynda qonaq úı qurylysy aıaqtalsa, keler jyly jumysyn bastaýy yqtımal. Budan basqa óńirlerde ınvestorlardy anyqtaý jumysy jalǵasyp jatyr, — dedi mınıstr.
Budan buryn habarlanǵandaı, jyl basynda Senat «Qazaqstan Respýblıkasynyń keıbir zańnamalyq aktilerine týrıstik salany jáne balalar sportyn qoldaý máseleleri boıynsha ózgerister men tolyqtyrýlar engizý týraly» Zań maquldady.
Zańmen elimizdiń oıyn bıznesin ornalastyrýǵa ruqsat etiletin aýmaqtardyń tizbesi keńeıtiledi. Burynǵy Qapshaǵaı, Býrabaıdan bólek, endi Mańǵystaý, Jetisý, Almaty jáne Shyǵys Qazaqstan oblystarynyń týrıstik mańyzy bar aımaqtarynda jańa oıyn zonalarynyń qurylýy óńirlerge ınvestorlar men sheteldik saıahatshylardy tartýdyń qosymsha tetigine aınalady.
Bul rette zańda mańyzdy áleýmettik jáne ekonomıkalyq tosqaýyl qoıylǵan: jańadan belgilengen aýmaqtardaǵy oıyn mekemelerine tek sheteldik azamattardyń kirýine ruqsat beriledi.
