Qazaqstanda tek sheteldikterge arnalǵan jańa kazınolar ashylady
ASTANA. KAZINFORM — Qazaqstan Respýblıkasynyń oıyn bıznesi týraly zańyna engizilgen ózgeristerge sáıkes, eldiń jańa óńirlerinde kazıno ashylady.
Atap aıtqanda, «Oıyn-saýyq mekemeleriniń, býkmekerlik keńseler men totalızatorlardyń (olardyń kassalarynyń) ornalasý oryndary» týraly bapqa tolyqtyrýlar engizildi.
— Mańǵystaý oblysynda Kaspıı teńiziniń jaǵalaýynda, Jetisý oblysynyń Panfılov aýdanynda, Alakól kóliniń jaǵalaýynda, Almaty oblysynyń Talǵar aýdanynda, Marqakól aýmaǵynda jáne Shyǵys Qazaqstan oblysynyń Zaısan aýdanynda oıyn-saýyq oryndary ashylady, — delingen qujatta.
Sonymen qatar zańda kazıno, oıyn avtomattary zaldary, býkmekerlik keńseler men totalızatorlardy erekshe qorǵalatyn tabıǵı aýmaqtarda, tarıhı-mádenı mańyzy bar jerlerde, sondaı-aq qorǵanys jáne ulttyq qaýipsizdik maqsatyndaǵy jerlerde ornalastyrýǵa tyıym salynatyny kórsetilgen.
Budan bólek, zań jańa tarmaqpen tolyqtyryldy. Onda joǵaryda atalǵan óńirlerde ornalasatyn kazıno, oıyn avtomattary zaldary, býkmekerlik keńseler men totalızatorlarǵa tek shetel azamattary men azamattyǵy joq adamdar, sondaı-aq sol mekemelerdiń qyzmetkerleri jáne qyzmettik mindetterin oryndaý maqsatynda júrgen ózge de tulǵalar ǵana kire alatyny belgilengen.
Aıta keteıik, Senattyń jalpy otyrysynda «Qazaqstan Respýblıkasynyń keıbir zańnamalyq aktilerine týrıstik salany jáne balalar sportyn qoldaý máseleleri boıynsha ózgerister men tolyqtyrýlar engizý týraly» Zań maquldanǵan edi.
Sonymen qatar onlaın kazınony jarnamalaǵandardyń tabysy tárkilenip, eki ese aıyppul salynýy múmkin.
Qazirgi tańda Qonaev qalasynda 5 kazıno resmı jumys istep tur. Oǵan qosa, qumar oıyn salasynda úsh myńnan astam adam jumys isteıdi.
