Qazaqstanda tek 200 mıkroqarjylyq uıym zańdy jumys isteıdi
ALMATY. QazAqparat - Qazaqstanda jumys istep júrgen 2 myńǵa jýyq shaǵyn nesıeleý uıymdarynyń tek 200-i ǵana Ulttyq bankte qaıta tirkeýden ótken.
Bul məlimetti QR Ulttyq bankiniń tóraǵasy Danııar Aqyshev jýrnalıstermen kezdesýi barysynda aıtty.
Onyń aıtýynsha, tirkeýden ótpegen uıymdardyń halyqqa nesıe berýge haqysy joq. Olardyń jumysy zańsyz dep tanylady.
«2014 jyly qabyldanǵan zań 2015 jyly kúshine endi. Buryn shaǵyn nesıe uıymdarynyń qyzmetin naryqta eshkim rettemeıtin. Olar ózderi bólek quqyq keńistiginde jumys jasady. Endi olardyń barlyǵy Ulttyq bankte qaıta tirkeýden ótip, Shaǵyn qarjylyq uıymnyń mərtebesin alýy tıis. Al shaǵyn nesıe uıymdary múlde naryqtan joǵalýy kerek»,- dedi D.Aqyshev.
Qarjylyq retteýshi quqyq qorǵaý organdarymen tize qosyp jumys istep otyr. Shaǵyn nesıe uıymdary nyń sany azaıǵanymen olar əli de bar. Olardyń jumys isteýine tutynýshylar tarapynan suranystyń kóp bolýy yqpal etip otyr. Paıyzdyq mólsherleme joǵary bolǵanyna qaramastan halyq ShNU-nan qaryz alýyn toqtatar emes.
«Bul jerde shaǵyn nesıe men shaǵyn qarjy uıymdary bolǵandyqtan, múmkin məsele termınderdiń uqsastyǵynda bolar. Óıtkeni adamdarǵa ekeýi de bir uǵym sııaqty. Alaıda, Ulttyq bank bul termınderdi ədeıi jasady. Naryqta zańdy jumys isteý úshin endi shaǵyn nesıe uıymdary shaǵyn qarjy uıymdaryna aınalady. Atyn ózgertpegen jaǵdaıda uıym zańsyz jumys jasap jatyr degen sóz. Shaǵyn nesıe degenimiz az ýaqytta joǵary protsentpen aqsha berý degen sóz. Ósim óte joǵary», - dedi D.Aqyshev.
Bas bankır belgilengen stavkadan joǵary protsentpen qaryz beretin uıymdardyń tikeleı zań buzýshylar dep atady.
«Shaǵyn qarjylyq uıymdardyń jumysy retteledi. Olardyń stavkany jylyna 56 paıyzdan asyrmaýy tıis. Zańdy jumys istegisi kelmegender quqyq qorǵaý organdarymen retteledi. Sondaı-aq halyqtyń qarjylyq saýaty joǵary bolǵany da mańyzdy», - dedi ol.
