Qazaqstanda tehnologııalyq quzyretterdiń salalyq ortalyqtaryn qurý usynyldy

NUR-SULTAN. QazAqparat - Elimizde ınnovatsııalar men ǵylymdy damytý úshin ınnovatsııalyq ekojúıe steıkholderleriniń kúsh-jigerin biriktirý usynyldy. «Elbasy akademııasy» korporatıvtik qorynda ótken onlaın-pikirtalas kezinde QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Azamat Batyrqoja osyndaı usynys bildirdi, dep habarlaıdy QazAqparat.

Onlaın-kezdesýdiń taqyryby – «Qazaqstandaǵy ǵylymdy damytýdyń jańa modeli». Kezdesý «Ózgeristerdi basqarý boıynsha salalyq menedjerlerdi daıarlaý» baǵdarlamasyna qatysýshylardyń usynystaryn naqtylaý maqsatynda uıymdastyrylǵan edi. Oǵan Prezıdenttiń kómekshisi-QR Qaýipsizdik Keńesiniń hatshysy Áset Isekeshev, QR Bilim jáne ǵylym mınıstri Ashat Aımaǵambetov, «Elbasy akademııasy» korporatıvtik qorynyń dırektory Farhad Qýanǵanov, ózge de mınıstrlikter men vedomstvolardyń birinshi basshylary jáne ǵylymı qoǵamdastyqtyń ókilderi qatysty.

Azamat Batyrqojanyń aıtýynsha, ınnovatsııa men ǵylymdy tıimdi damytý úshin úzdik otandyq sarapshylardy salalyq tehnologııalyq quzyrettilik ortalyqtarynda toptastyrý qajet.

«Biz eldegi ınnovatsııalyq ortaǵa taldaý júrgizdik. Innovatsııalyq ári tehnologııalyq damýǵa qajetti zańnamalyq jáne baǵdarlamalyq qujattar qabyldandy, tıisti ókilettik berilgen damý ınstıtýttary quryldy. Alaıda, bul jetkiliksiz dep oılaımyz. Tehnologııalyq trendterge baǵa berýge quzyretti jáne salalarda tehnologııalyq strategııalardy qalyptastyrýǵa qabiletti úzdik otandyq sarapshylardy biriktiretin tehnologııalyq quzyretterdiń salalyq ortalyqtary qajet. Al tehnologııalyq platformalar barlyq steıkholderlerdiń – memleket, bıznes, ǵylym, bilim jáne qoǵam ókilderiniń múddelerin úılestirýge jáne kúsh-jigerin biriktirýge múmkindik beredi»,-dedi QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri.

Sarapshylardyń paıymynsha, ǵylymdy, tehnologııalardy, ınnovatsııalardy jáne tehnologııalyq saıasatty qoldaýǵa jaýapty memlekettik organdar men damý ınstıtýttary arasyndaǵy úılestirý jumystary nashar. Sondyqtan strategııalyq deńgeıde memlekettik tehnologııalyq jáne ınnovatsııalyq saıasatty ázirleýdi ári iske asyrýdy qamtamasyz etetin biryńǵaı organ qajet.