Qazaqstanda tehnıkalyq retteýde memlekettik qyzmettiń jańa standarttary kúshine endi

«Bıznes úshin ákimshilik kedergilerdi azaıtý sheńberinde QR IDM Tehnıkalyq retteý jáne metrologııa komıteti kórsetetin memlekettik qyzmettiń standarttary qaıta qaralyp, bekitildi. Kórsetiletin memlekettik qyzmet boıynsha ólshem quraldarynyń tıpin bekitý týraly sertıfıkat alý úshin qujattar toptamasy 8-den 3-ke deıin qysqartyldy, metrologııalyq attestattaý týraly sertıfıkat alý úshin qujattar toptamasy 7-den 2-ge deıin, al qyzmet kórsetý merzimi 20 kúnnen 15 jumys kúnine deıin azaıtyldy. Sonymen qatar memlekettik basqarýdyń metrologııalyq qyzmetteriniń, jeke jáne zańdy tulǵalardyń qyzmetti júzege asyrý jónindegi normatıvtik qujattardy kelisý merzimi 20 kúnnen 5 jumys kúnine deıin qysqartyldy», - dep atap ótti QR IDM baspasóz qyzmetinen.

Atap aıtqanda, Qazaqstan Respýblıkasy Úkimetiniń qaýlysymen kórsetiletin úsh memlekettik qyzmetti 2016 jyldan bastap Halyqqa qyzmet kórsetý ortalyqtary arqyly kórsetýdi kózdeıtin tolyqtyrýlar qabyldandy.

Búgingi kúni kórsetiletin eki memlekettik qyzmet: sarapshy-aýdıtorlardy attestattaý, memlekettik rámizderdi daıyndaýǵa arnalǵan lıtsenzııa berý elektrondyq portal arqyly kórsetiledi. Bul memlekettik qyzmetti alýshynyń jeke kabıneti arqyly júginip, memlekettik kórsetiletin qyzmet nátıjesin alýǵa múmkindik beredi.

Sonymen qatar, kórsetiletin memlekettik qyzmetti paıdalanýshylar úshin www.memst.kz saıtynda memlekettik kórsetiletin qyzmetterdiń tizbesi, ruqsat berý qujattarynyń pasporttary ornalastyrylǵan.