Qazaqstanda tehnıkalyq baıqaýdan ótpegen avtobýstardy lıtsenzııadan aıyrý usynyldy
ASTANA. QazAqparat - QR Іshki ister mınıstrligi tehnıkalyq baıqaý qujaty joq bolǵan jaǵdaıda jolaýshylar avtobýsyn lıtsenzııadan aıyrýdy usynýda, dep habarlaıdy «QazAqparat» HAA tilshisi.
«Zańdy jáne zańsyz tasymaldaýshylardyń qyzmetin retteý maqsatynda «Avtomobıl kóligi týraly» zańǵa tıisti ózgeris engizý qajet. Jolaýshylar tasymalyn júzege asyratyn, tehnıkalyq baıqaýdan ótpegen, ruqsatsyz qaıta jabdyqtalǵan avtobýstar anyqtalǵan jaǵdaıda olardyń lıtsenzııasyn keri qaıtaryp alý ne onyń áreketin toqtata turýdy zańnama júzinde engizýdi qajet dep esepteımiz», - dep jaýap beredi depýtattyq saýalǵa Іshki ister mınıstri Qalmuhanbet Qasymov.
Mınıstrdiń paıymdaýynsha, Investıtsııalar jáne damý mınıstrliginiń Kólik komıteti atynan jolaýshylardy kólik arqyly tasymaldaýdy rettep otyratyn bir memlekettik organ bolýy tıis. Sondaı-aq, mınıstr ol organǵa qujattardy jáne tasymaldaýshylardyń tasymal kezinde qaýipsizdik talaptaryn saqtaýdy tekserý úshin avtobýstardy toqtatý quqyǵyn berý qajet dep esepteıdi.
ІІM deregine sáıkes, Qazaqstanda qazirgi tańda shamamen 90,5 myń avtobýs tirkelgen.
«Ádette júrgizýshilerdiń jol qozǵalysy, kólik quralyn paıdalaný qaǵıdalaryn saqtamaýy jáne kóliktiń tehnıkalyq jaǵdaıy úshin jaýapty adamnyń ony aqaýly kúıde saparǵa shyǵarýy jol-kólik oqıǵalaryna sebepshi bolady», - delingen jaýapta.
ІІM basshysynyń habarlaýynsha, 2014 jyldan bastap «Jol qozǵalysy týraly» zańymen polıtsııa qyzmetkerlerine kólik quraldaryn sebepsiz toqtatýǵa tyıym salyndy. Іshki ister organdarynyń qyzmetkerleri avtobýstardy jáne ózge kólik quraldaryn tekserýdi jedel-profılaktıkalyq is-sharalardy júrgizý kezinde polıtsııanyń statsıonarlyq beketterde ǵana, sondaı-aq kólik quraldary júrgizýshileriniń jol qozǵalysy qaǵıdalaryn buzǵan jaǵdaıda teksere alady.
Avtor: Damır Baımanov
