Qazaqstanda tehnıkalyq aqaýy bar kólikti paıdalaný kóbeıdi

NUR-SULTAN. QazAqparat – Qazaqstanda tehnıkalyq aqaýy bar kólikti paıdalaný úrdisi kóbeıdi. QR Іshki ister mınıstrligi Ákimshilik polıtsııa komıteti tóraǵasynyń orynbasary Serik Túsipov aıtyp berdi, dep habarlaıdy QazAqparat.

«Joldardaǵy qaýipsizdik deńgeıin anyqtaıtyn faktorlardyń biri – avtokóliktiń tehnıkalyq jaǵdaıy. Úsh jyldyq kezeńdegi (2018-2020 jyldar) quqyq qoldaný praktıkasynyń taldaýy kórsetkendeı, elde tehnıkalyq aqaýy bar kólikti paıdalaný kóbeıgen», - dedi Serik Túsipov mınıstrlikte ótken onlaın brıfıngide.

Spıkerdiń aıtýynsha, 2018 jyly qaýipsizdik talaptaryna saı kelmeıtin, onyń ishinde kólikti paıdalanýǵa tyıym salynǵan aqaýy bar avtokólikterdi júrgizgeni úshin 80,5 myń, 2019 jyly – 100,7 myń jáne 2020 jyly – 120,5 myń júrgizýshi ákimshilik jaýapkershilikke tartyldy.

«Sońǵy úsh jylda tejegish júıesi, rýldik basqarý jáne tartý-tirkeý qurylǵylary buzylǵan avtokólikterdi paıdalanýdyń 516 faktisi anyqtaldy (2018 jyly – 158, 2019 jyly – 224, 2020 jyly – 134). Atalǵan kezeńde tıisti ruqsatsyz qaıta jabdyqtalǵan kólik quraldaryn júrgizýdiń 25,2 myń faktisi anyqtaldy (2018 jyly – 4 711, 2019 jyly – 11 155, 2020 jyly – 9 363)», - dep atap ótti Serik Túsipov.