Qazaqstanda tehnıkalyq qarasora egisi júrgizilgen joq – Aýyl sharýashylyǵy mınıstrligi
ASTANA. KAZINFORM - Ótken jyly Qazaqstanda tehnıkalyq qarasorany ósirý men óńdeýge zań júzinde ruqsat berilgen bolatyn. Alaıda bıyl tehnıkalyq qarasora egý jumystary júrgizilmegendikten, 2026 jyly onyń ónimi de bolmaıdy. Bul týraly Aýyl sharýashylyǵy mınıstrligi Kazinform agenttiginiń tilshisiniń resmı saýalyna bergen jaýabynda málimdedi.
Mınıstrliktiń túsindirýinshe, bıyl Qazaqstan aýmaǵynda tehnıkalyq qarasora ósirilmegen.
– Egis jumystary júrgizilgen joq. Osyǵan baılanysty egis alqaptary joq jáne 2026 jyly tehnıkalyq qarasora ónimi kútilmeıdi, – delingen mınıstrliktiń jaýabynda.
Sonymen qatar mınıstrlik qazirgi ýaqytta jalpy quny shamamen 398,4 mıllıon AQSh dollar bolatyn segiz ınvestıtsııalyq jobadan turatyn pýl qalyptastyrylǵanyn habarlady. Bul jobalardyń jalpy óńdeý qýaty jylyna 50 myń tonna qarasorany óńdeýge múmkindik beredi. Qazirgi kezde atalǵan jobalar ártúrli daıyndyq jáne iske asyrý kezeńderinde tur.
Jobalar aıasynda tsellıýloza men qaǵaz ónimderin, toqyma materıaldaryn (talshyq, kotonın jáne ıirilgen jip), medıtsınalyq jáne farmatsevtıkalyq maqsattaǵy ónimderdi, sondaı-aq qurylys jáne kompozıttik materıaldardy óndirý josparlanyp otyr.
Aýyl sharýashylyǵy mınıstrliginiń málimetinshe, bul jobalardyń iske asyrylýy Qazaqstanda qosylǵan quny joǵary tehnıkalyq qarasorany óńdeıtin jańa salany qalyptastyrýǵa múmkindik beredi. Sonymen qatar tsellıýloza men toqyma shıkizaty ımportyna táýeldilikti azaıtyp, ınvestıtsııalar men zamanaýı tehnologııalardy tartýǵa, jańa jumys oryndaryn ashýǵa jáne óńdelgen ónimniń eksporttyq áleýetin arttyrýǵa yqpal etedi.
Mınıstrlik sondaı-aq jobalar iske qosylǵannan keıin ónerkásiptik maqsatta ósirýge ruqsat etilgen tehnıkalyq qarasoranyń suryptary ǵana paıdalanylatynyn atap ótti.
Aıta keteıik, Temirtaý mańynda jylyjaıda ósirilgen 125 túp qarasora anyqtaldy.
