Qazaqstanda tegin zań kómegin kórsetý tártibine ózgerister engizildi

ASTANA. KAZINFORM — 2025 jylǵy 24 qyrkúıektegi Ádilet mınıstriniń buıryǵyna sáıkes, memleket kepildik bergen zań kómegin kórsetýge jáne quqyqtyq keńes berý, qorǵaý, ókildik etý men tatýlastyrý rásimderine baılanysty shyǵyndardy óteý mólsheri qaıta qaraldy.

Atap aıtqanda, qorǵalýǵa quqyǵy bar kýáger memleket kepildik bergen tegin zań kómegin alý quqyǵyna ıe tulǵalar tizimine engizildi. Endi advokattar bul sanattaǵy adamdarǵa kómek kórsetkeni úshin memleketten ótemaqy ala alady.

Tegin zań kómeginiń sheńberinde kelesi qyzmet túrleri qarastyrylǵan:

• qoldanystaǵy zańnamada kózdelgen jaǵdaılarda ótinishter, aryzdar, protsestik kelisimder men medıatsııa tártibimen tatýlasý týraly kelisimder jasaý (korrýptsııalyq jáne memlekettik qyzmet múddesine qarsy ózge de qylmystyq isterden basqa);

• anyqtaýshy, tergeýshi, prokýror men sottyń áreketterine (áreketsizdigine) jáne sheshimderine, sondaı-aq apellıatsııalyq, kassatsııalyq jáne basqa da shaǵymdarǵa qarsy ótinishter men shaǵymdar jasaý;

• azamattyq talapkermen, azamattyq jaýapkermen medıatsııa nemese partısıpatıvtik tártippen daýdy retteý týraly kelisimder jasaý;

• asa aýyr qylmys jasaǵan kúdikti, aıyptalýshy, sottalýshy nemese sondaı qylmystan jábirlenýshi dep tanylǵan adamnyń nemese qorǵaý quqyǵyna ıe kýániń múddesin qorǵaýǵa arnalǵan azamattyq talapqa jaýap daıyndaý.

Atalǵan buıryq 2025 jylǵy 7 qazannan bastap kúshine enedi.

Buǵan deıin Densaýlyq saqtaý mınıstrliginiń buıryǵymen statsıonarlyq jaǵdaılarda medıtsınalyq kómek kórsetýdi uıymdastyrý standarttaryna ózgerister engizilgenin jazǵanbyz.