Qazaqstanda tegin ota kimderge jasalady

PETROPAVL. KAZINFORM – Tegin medıtsınalyq kómektiń kepildik berilgen kólemi (TMKKK) aıasynda el azamattaryna, qandastarǵa jáne turýǵa yqtııarhaty bar sheteldikterge ota tegin jasalady.

TMKKK aıasynda tegin ota: 

• Qazaqstan Respýblıkasynyń azamattaryna;
• Qandastarǵa;
• Turýǵa yqtııarhaty bar adamdarǵa jasalady.

Kómek josparly túrde de, kútpegen oqys jaǵdaılarda da kórsetiledi.

- Operatsııalar medıtsınalyq kórsetilimder bolǵan kezde júrgiziledi, ol josparly jáne shuǵyl hırýrgııalyq aralasýdy qajet etýi múmkin. Qymbat, joǵary tehnologııalyq otalar da bul sanatqa jatatyn azamattarǵa qoljetimdi ekenin, ıaǵnı tegin jasalatynyn aıta ketý qajet, - deıdi Densaýlyq saqtaýdy damytýdyń ulttyq ǵylymı ortalyǵy sarapshylary.

Bir sebeptermen medıtsınalyq kómek kórsetilmese nemese naýqas medıtsınalyq kórsetilimder boıynsha joldama ala almasa, ol patsıentterdi qoldaý qyzmetine júgine alady.

- Qazaqstanda osyndaı máselelerdi sheshýmen aınalysatyn arnaıy qyzmetter jumys isteıdi. Eger másele emhana nemese emdeý mekemesi deńgeıinde sheshilmese, syrqattar «Qoldau 24/7» mobıldi qosymshasy arqyly nemese 1414 baılanys ortalyǵyna, Telegram-daǵy Saqtandyru-bot-qa jáne msqory.kz resmı saıt arqyly júgine alady, - deıdi ÁMSQ Shymkent qalalyq fılıalynyń baspasóz hatshysy Sáýle Aljanbaeva.

Buǵan deıin biz Qazaqstanda kim tisin tegin emdete alatyndyǵyn jazdyq.

Sondaı-aq elimizdiń aqyly joldarynda kimder tegin júre alatyndyǵyn jáne elordada aqyly avtoturaqty kimder tegin paıdalana alatyndyǵyn da bile alasyz.