Qazaqstanda tegin kórsetilimdermen anımatsııa aptalyǵy ótip jatyr
ASTANA. KAZINFORM – Qazaqstanda balalarǵa, jasóspirimderge jáne otbasylyq kórermenge arnalǵan otandyq mýltfılmderdiń tegin kórsetilimderi bar anımatsııa aptalyǵy uıymdastyryldy, dep habarlaıdy Mádenıet jáne aqparat mınıstrligi.
Vedomstvo málimetinshe, tegin seanstar Astanadaǵy «Arsenal» kınoteatrynda jáne Qaraǵandydaǵy «Saryjaılaý» kınoteatrynda ótýde. Sonymen qatar QR Qarýly kúshteri Ulttyq áskerı-patrıottyq ortalyǵynyń qoldaýymen kórsetilimder elordadaǵy ortalyq alańda, sondaı-aq Semeı, Otar, Saryózek jáne Almaty garnızondarynda uıymdastyrylyp, áskerı qyzmetshilerdiń otbasylaryn qamtyp otyr.
– Aptalyq baǵdarlamasy ár jastaǵy kórermenge arnalǵan. Oǵan tolyqmetrajdy anımatsııalyq ertegiler, avtorlyq qysqametrajdy fılmder, 2025 jylǵy eksklıýzıvti premeralar engizildi. Jańa týyndylarmen qatar «Qazaqfılm» kınostýdııasynyń jáne Ulttyq kınony qoldaý ortalyǵynyń altyn qoryndaǵy mýltfılmder de kórsetilýde, – delingen habarlamada.
Mınıstrliktiń málimetinshe, joba Sháken Aımanov atyndaǵy «Qazaqfılm» kınostýdııasy janyndaǵy «Qazaqanımatsııa» shyǵarmashylyq birlestigi tarapynan Mádenıet jáne aqparat mınıstrligi men Memlekettik ulttyq kınony qoldaý ortalyǵynyń qoldaýymen júzege asyrylyp jatyr.
Vedomstvo bul bastama ulttyq anımatsııany damytýǵa, memlekettik tildegi sapaly kontentti nasıhattaýǵa jáne otandyq mýltfılmderdiń kórermen aýdıtorııasyn keńeıtýge baǵyttalǵanyn atap ótti.
Buǵan deıin Labubu oıynshyǵy týraly anımatsııalyq fılm túsiriletini habarlandy.
