Qazaqstanda tegin dárilerdi qaıta satýdyń 25 myńnan asa jaǵdaıy tirkeldi
ASTANA. KAZINFORM — Tańbalaý júıesi dárilik preparattardyń zańsyz aınalymyn avtomatty túrde anyqtap otyr, dep habarlaıdy Densaýlyq saqtaý mınıstrliginiń baspasóz qyzmeti.
Sońǵy eki jylda dárilik zattardy tsıfrlyq tańbalaý júıesi alǵash ret dárilik preparattar aınalymynyń naqty kólemin senimdi baǵalaýǵa múmkindik berdi. Búgingi tańda shamamen 1 mıllıard dárilik preparat tańbalandy.
Onyń ishinde shamamen 604 mıllıony — ımporttyq dárilik zattar, al 400 mıllıony — otandyq óndirýshilerdiń ónimderi. Sonymen qatar, 457 mıllıonnan astam qaptama aınalymnan shyǵarylyp, túpkilikti tutynýshylarǵa ótkizildi.
Tańbalaý júıesin engizýdiń mańyzdy nátıjeleriniń biri — kúmándi operatsııalardy avtomatty túrde anyqtaý múmkindigi boldy. Júıe tegin dárilik qamtamasyz etýge arnalǵan dárilik zattardyń dárihanalarda qaıta satylýynyń 25 myńnan astam jaǵdaıyn tirkedi.
Buǵan deıin buryn satylǵan preparattardy qaıta ótkizý, qaptamalardy aýystyrý nemese jaramdylyq merzimin zańsyz ózgertý sııaqty zańbuzýshylyqtar negizinen baqylaý tekseristeri barysynda anyqtalatyn.
Qazirgi tańda tańbalaý júıesi mundaı jaǵdaılardy avtomatty túrde tirkep, jedel áreket etý úshin aqparatty ýákiletti memlekettik organdarǵa dereý jiberedi. Osylaısha, Densaýlyq saqtaý mınıstrligi eldiń farmatsevtıkalyq naryǵyn úzdiksiz onlaın rejımde baqylaýǵa múmkindik beretin tıimdi quralǵa ıe boldy. Retteýshi organ dárilik zattar aınalymyna qatysýshylardyń sany týraly ózekti aqparatqa qol jetkize alady.
— Júıe saraptamalyq baǵalaýlarǵa súıenbeı-aq ımport pen otandyq óndiristiń naqty kólemin kórýge, árbir dárilik qaptamanyń qozǵalysyn qadaǵalaýǵa jáne azamattardan shaǵym túspeı turyp-aq kúmándi nemese áleýetti qaýpi joǵary operatsııalardy avtomatty túrde anyqtaýǵa múmkindik beredi. Árbir qaptamadaǵy biregeı Data Matrix kody kontrafaktilik ónimderdi óndirý men ótkizýdi tehnologııalyq turǵydan edáýir qıyndatady. Tirkelmegen dárilik preparattardy nemese jalǵan ónimderdi aınalymǵa engizýge jasalǵan kez kelgen áreket júıe arqyly olardy ótkizýdiń alǵashqy áreketi kezinde-aq anyqtalady, — delingen mınıstrlik taratqan aqparatta.
Dárilik zattardy tsıfrlyq tańbalaý Qazaqstannyń densaýlyq saqtaý júıesin tsıfrlyq transformatsııalaýdyń negizgi elementteriniń birine aınalyp, farmatsevtıkalyq naryqtyń ashyqtyǵyn qamtamasyz etýge, patsıentterdiń qaýipsizdigin arttyrýǵa jáne halyqty dárilik zattarmen qamtamasyz etý sapasyna baqylaýdy kúsheıtýge múmkindik berdi.
Budan buryn Astanada jeńildetilgen dári-dármekpen qamtýǵa 34,4 mlrd teńge suralǵanyn jazdyq.
