Qazaqstanda tegin úıirmelerdi qarjylandyrý kólemi artady

NUR-SULTAN. QazAqparat –QR Mádenıet jáne sport mınıstri Dáýren Abaev tegin mádenı úıirmeler boıynsha týyndaǵan problema týraly pikir bildirdi, dep habarlaıdy QazAqparat tilshisi.

«Bul másele jumys istep tur. Tek 2-3 oblysta ǵana ótinimderdiń kóp kelýinen problema týyndady. Úıirmege qatysqysy keletinderdiń sany jospardaǵydan kóp bolyp shyqqan. Bul jerde máseleni sheshýdiń bir joly ǵana bar. Biz qarjylandyrý kólemin ulǵaıtamyz. Baǵdarlama ári qaraı jumys isteı beredi», - dedi vedomstvo basshysy.

Onyń málimeti boıynsha, atalǵan úıirmelerge bólinýi tıis qarajattyń naqty kólemi men merzimin jergilikti ákimdikter eseptep, anyqtaıdy.

«Másele qarjyda emes, tegin úıirme qyzmetin usynýdyń sharttaryn retteýge kelip tirelip tur. Úkimet otyrysynda aıtqanymdaı, qujatta bar, naqty ómirde joq jandar paıda bolyp jatyr. Sondyqtan bul máseleni jýyq arada sheshýimiz kerek. Búginge deıin bul baǵdarlamanyń múmkindigin 500 myń bala paıdalanyp úlgergen. Menińshe, bul tamasha kórsetkish. ıAǵnı, tegin úıirmeler jabylmaıdy», - dedi Dáýren Abaev.