Qazaqstanda tegin medıtsınalyq kómek kórsetiletin aýrýlardyń tizbesi
ASTANA. QazAqparat - Qazaqstandyqtar medıtsınalyq saqtandyrýǵa qaramastan aýrýlardyń keıbir túrleri boıynsha tegin medıtsınalyq kómek alady, dep habarlaıdy QazAqparat.
«Mindetti áleýmettik medıtsınalyq saqtandyrýdy engizý sheńberinde, sondaı-aq medıtsınalyq qyzmet kórsetý maqsatynda Qazaqstan Respýblıkasy Densaýlyq saqtaý mınıstrligimen áleýmettik mańyzy bar aýrýlardyń jáne qorshaǵan ortaǵa qaýip keltiretin aýrýlardyń tizimin bekitti. Atalǵan normatıvti-quqyqtyq aktige sáıkes, respýblıkanyń azamattaryna medıtsınalyq saqtandyrýdyń bar-joǵyna qaramastan, joǵaryda kórsetilgen tizbedegi barlyq aýrýlarǵa kepildendirilgen tegin medıtsınalyq kómek kóleminiń aıasynda medıtsınalyq qyzmet alýǵa bolady»,-dep atap ótilgen atalǵan mınıstrliktiń málimetinde.
Atap aıtqanda, tizimge sáıkes, áleýmettik mańyzy bar aýrýlarǵa 13 dert túri kiredi.
Olardyń qatarynda týberkýlez; adam ımmýnıteti jetispeýshiligi saldarynan týyndaǵan aýrý jáne adam ımmýnıteti jetispeýshiligi vırýsyn tasymaldaýshylar; V, S vırýsty gepatıti; qaterli jańadan paıda bolǵan óskinder; qant dıabeti; psıhıkanyń jáne júris-turystyń buzylýy; balalardaǵy tserebraldy sal aýrýy; mıokard ınfarktisi (alǵashqy alty aıda); revmatızm; dáneker tinderdiń júıeli buzylýy; ortalyq júıke júıesiniń tuqym qýalaıtyn-degeneratıvti aýrýlary; ortalyq júıke júıesiniń mıelınsizdendirý aýrýlary; orfandyq (sırek kezdesetin) aýrýlary qamtylǵan.
Bul rette, qorshaǵan ortaǵa qaýip keltiretin aýrýlar tizimine 16 aýrý túri kirdi: adam ımmýnıteti jetispeýshiligi saldarynan týyndaǵan aýrý jáne adam ımmýnıteti jetispeýshiligi vırýsyn tasymaldaýshylar; týberkýlez; gemorragııalyq qaltyraý; dıfterııa; menıngokokk ınfektsııasy; polıomıelıt; psıhıkanyń jáne júris-turystyń buzylýy; jynystyq jolmen beriletin ınfektsııalar; alapes; bezgek; sibir jarasy (ókpedegi formasy); tyrysqaq; oba; ish súzegi; A vırýstyq gepatıti; týlıaremııa.
