Qazaqstanda tegin dáriler qalaı urlanady

ASTANA. QazAqparat - Búginde tegin medıtsınalyq kómek aıasynda xalyqqa aqysyz beriletin dári-dármekter jekemenshik dárixanalarda satylady. QR Densaýlyq saqtaý mınıstrligi Farmatsııa komıtetiniń tóraıymy Lıýdmıla Bıýrabekova mundaı zań buzýshylyqtardyń qalaısha jasalatynyn aıtyp berdi.

"Shyny kerek, tegin medıtsınalyq kómektiń kepildendirilgen kólemine kiretin preparattar jekemenshik dárixanalarda satylady. Ondaı faktiler bar. Endi, taýar óndirýshi kompanııalar men dıstrıbıýtorlar ózara uryspaı-aq qoıaıyq dep, bizge eshteńe aıtpaıdy. Degenmen, bizge túsken málimetter boıynsha, tegin dárilerdi jasyryn satýǵa shyǵaryp jatady", - dedi L.Bıýrabekova QazAqparat tilishisine bergen suxbatynda.

Onyń aıtýynsha, qazirgi kezde retsepter elektrondy túrde beriledi. Aýrýxanadan ondaı retsepter birden dárixanaǵa túsedi. Alaıda keı kezde naýqastar dárixanaǵa barmaı qoıady, ıa bolmasa, preparattyń markasyn unatpaı, almaı ketedi. "Sol sııaqty sebepter kóp. Alaıda dárixanaǵa retsept túsip tur ǵoı. Olar preparatty berildi dep esep jasaıdy da, myna jaqtan ózderi sata salady", - dep atap kórsetti L.Bıýrabekova.

Aıta keteıik, búgin QR Premer-Mınıstriniń orynbasary Erbolat Dosaev xalyqty dári-dármekpen qamtamasyz etý salasyndaǵy buzýshylyqtardy atady. Úkimet basshysynyń orynbasary sáýir aıynyń aıaǵyna deıin barlyq oblystarda revızııa ótkizýdi tapsyrdy.

Densaýlyq saqtaý mınıstri Eljan Birtanov ta osy máselege qatysty óz pikirin bildirdi.