Qazaqstanda tegin beriletin dári-dármekterdiń tizbesi keńeıtiledi
ASTANA. 8 aqpan. QazAqparat - Qazaqstanda azamattardy dári-dármektermen tegin qamtamasyz etýdi qarjylandyrý somasy ulǵaıtylýda,
dep habarlady Densaýlyq saqtaý mınıstrliginiń Medıtsınalyq jáne farmatsevtıkalyq qyzmetti baqylaý komıteti tóraǵasynyń orynbasary Larısa Pak Pm.kz saıtyna bergen arnaıy suhbatynda.
«2011 jyly vaktsınalar men basqa da dárilik zattardy satyp alýǵa arnalǵan nysandy aǵymdaǵy transfertter aıasynda dárilik qamtamasyz etýge 1,3 mlrd. teńgege jýyq qarjy bólingen bolatyn. 2012 jyly bul kórsetkish 3,7 mlrd. teńgege deıin artady. Soǵan baılanysty tegin beriletin dárilik zattardyń tizbesi keńeıtilmek», - dedi Larısa Pak.
Qazaqstandyqtardyń tegin dári-dármektermen statsıonarlyq jáne ambýlatorlyq deńgeıde qamtamasyz etiletinin atap kórsetken maman, statsıtsonarlyq deńgeıde dárilik zattardyń bir dıstrıbıýter arqyly satyp alynatynyn aıtty.
«Salamatty Qazaqstan» baǵdarlamasynyń aıasynda 2012 jyldan bastap aýrýdyń jekelegen túrleri boıynsha dıspanserlik naýqastar da ambýlatorlyq deńgeıde dári-dármektermen tegin qamtamasyz etiletin bolady», - dep atap kórsetti L.Pak.
Larısa Paktyń aıtýynsha, tegin dárilik zattardyń tizbesine orfandyq (sırek kezdesetin) aýrýlarǵa qarsy dári-dármekter kirip otyr jáne onkogematologııalyq, trombolıtıkalyq preparattardyń qatary keńeıtilýde.
