Qazaqstanda Tech Girls baǵdarlamasy iske qosyldy
ASTANA. KAZINFORM — Qazaqstanda qyz-kelinshekterdiń tsıfrlyq bilimin arttyrýǵa arnalǵan Tech Girls baǵdarlamasy iske qosyldy. Bul týraly QR Prezıdenti janyndaǵy áıelder isteri jáne otbasy-demografııalyq saıasat jónindegi ulttyq komıssııanyń múshesi Ázıza Shójeeva aıtyp berdi.
Atalǵan baǵdarlama ulttyq komıssııanyń, Astana Hub halyqaralyq tehnoparki jáne Techno Women qaýymdastyǵynyń bastamasymen júzege asyp jatyr.
«Baǵdarlamanyń maqsaty — qyzdardyń tsıfrlyq bilimin arttyrý, kodsyz jáne tómen kodty baǵdarlamalaý negizderin úıretý jáne qyzdardy STEM-ge tartýǵa yqpal etý. Sondaı-aq, baǵdarlama aıasynda qyzdar mansapty josparlaý, qurý, suhbattan ótý jáne ózderi armandaǵan jumysqa turý týraly bilim alady. Bul onlaın rejımde ótetin tegin baǵdarlama jáne 16 men 25 jas aralyǵyndaǵy qyzdarǵa arnalǵan», — dedi Ázıza Shójeeva Ortalyq kommýnıkatsııalar qyzmetinde ótken baspasóz máslıhatynda.
Eki aıǵa sozylatyn Tech Girls baǵdarlamasy eldiń barlyq aımaǵynan kelgen 3000-nan astam qyzǵa no Code, Low Code jáne Beta Career baǵyttary boıynsha tegin oqytýdy usynady.
Bilim berý protsesine vebınarlar, vorkshoptar, tikeleı efırler, Techno Women jáne Astana Hub sarapshylary men tálimgerlerimen sessııalar kiredi.
Oqytý kezinde qatysýshylar ózderiniń IT ónimin jasaýǵa jáne jetekshi IT kompanııalarda taǵylymdamadan ótýge múmkindik alady.
«Byltyr IT Aiel jobasy sátti júzege asyrylǵan edi. Onda 18 jastan asqan jumysqa ornalaspaǵan 2675 áıel qatysýǵa ótinim berip, No Code School, Freelance School, sondaı-aq negizgi kompıýterlik saýattylyq kýrstaryn oqydy. Ótinishterdiń basym bóligi Astana qalasynan jáne Aqmola oblysynan, Almaty qalasy jáne Almaty oblysynan, Oral jáne Batys Qazaqstan oblysynan, Atyraý jáne Atyraý oblysynan tústi. Qatysýshylardyń ortasha jasy 32-de boldy. Baǵdarlama qorytyndysy boıynsha myńnan astam adam oqýdy aıaqtap, óz jobalaryn, ІT ónimderin, saıt nemese qosymsha qurýdy rastaıtyn sertıfıkat aldy», — dedi áıelder isteri jáne otbasylyq-demografııalyq saıasat jónindegi ulttyq komıssııanyń múshesi Alına Ábdirahmanova.
Bıyl da Tech Girls jáne Tech Aiel jobalaryn júzege asyrý josparlanyp otyr.
Mundaı jobalardyń negizgi maqsaty — IT daǵdylardy berý, qyzdarǵa negizgi nemese qosymsha kiris kózin tabýǵa, eń perspektıvaly ındýstrııalardyń birine kirýge kómektesý, jáne kásibı qoǵamdastyq qalyptastyrý.
«Byltyr It-Aiel jobasyn ótkizý tájirıbesi bizge áıelder úshin bir-birin qoldap, bıznes-ıdeıalarmen, tájirıbe almasatyn ortanyń qalyptasýy qanshalyqty mańyzdy ekenin kórsetti. Bul jobalar Qazaqstanda IT-kadrlardy daıarlaýǵa aıtarlyqtaı úles qosady, ІT sııaqty perspektıvaly, barynsha ınklıýzıvti jáne qomaqty aqy tólenetin salaǵa qosylatyn qyzdar men áıelder sany artady dep oılaımyz», — deıdi A. Ábdirahmanova.
Qatysýǵa ótinim 7 aqpannan 1 naýryzǵa deıin qabyldanady.
TechGirls baǵdarlamasy týraly qosymsha aqparat alý úshin Astana Hub qoldaý qyzmetine 2222 qysqa nómiri boıynsha habarlasýǵa bolady.
