Qazaqstanda tazalyqtyń ulttyq standarty paıda bolady: bes negizgi baǵyt belgilendi
ASTANA. KAZINFORM — Qazaqstanda tazalyqtyń ulttyq standartyn engizý josparlanyp otyr. Jańa júıe ekologııalyq aǵartý, ekologııalyq volonterlik, eldi mekenderdiń tazalyǵy men abattandyrylýy, kógaldandyrý jáne tabıǵı aýmaqtardyń tazalyǵy sııaqty bes negizgi baǵytty qamtıdy. Bul týraly Úkimette ótken keńeste aıtyldy.
Prezıdenttiń tazalyqtyń ulttyq standartyn ázirleý jónindegi tapsyrmasy aıasynda ekologııa jáne tabıǵı resýrstar mınıstri Álibek Qýantyrov ony qalyptastyrý tásilderin tanystyrdy.
Ulttyq standartty bes taqyryptyq baǵyttan turatyn júıe retinde qalyptastyrý usynylyp otyr, olar — ekologııalyq aǵartý, ekologııalyq volonterlik, eldi mekenderdiń tazalyǵy men abattandyrylýy, olardy kógaldandyrý, sondaı-aq tabıǵı aýmaqtardyń tazalyǵy. Árbir baǵytty ázirleýge jáne engizýge tıisti memlekettik organ jaýapty bolady, jalpy úılestirýdi Úkimet deńgeıinde júzege asyrý josparlanyp otyr.
Ekologııa jáne tabıǵı resýrstar mınıstrliginiń derekteri boıynsha «Taza Qazaqstan» aktsııasy júzege asyryla bastaǵannan beri 10 myńǵa jýyq qoqys orny joıylǵan, 7 mln aǵash otyrǵyzylyp, 2 myńnan astam volonterlik joba júzege asyrylǵan. Ekologııalyq tárbıe boıynsha 560 myńnan astam synyp saǵattary ótkizilgen. TazaQazBot arqyly azamattardan sanıtarlyq jaǵdaı jáne aýmaqtardy abattandyrý máseleleri boıynsha 57 myńnan astam ótinish kelip túsken.
Usynylǵan tásilderdi eskere otyryp, Oljas Bektenov Ekologııa jáne tabıǵı resýrstar, Saýda jáne ıntegratsııa, Mádenıet jáne aqparat, oqý-aǵartý, Ǵylym jáne joǵary bilim mınıstrlikterine ákimdiktermen birlesip árbir baǵyt boıynsha biryńǵaı talaptar daıyndaýdy tapsyrdy. Standartta qarapaıym, túsinikti jáne naqty talaptar bolýy kerek. Sonymen qatar, mınıstrlikterge «Taza Qazaqstan» brendi sheńberinde qoǵamda joǵary ekologııalyq mádenıetti qalyptastyrý jónindegi keshendi sharalar qabyldaý tapsyryldy.
Aıta keteıik, Prezıdent Qasym-Jomart Toqaevtyń «Taza Qazaqstan» ekologııalyq aktsııasy aıasyndaǵy is-sharada «Ádiletti, Qaýipsiz, Ozyq jáne Taza Qazaqstandy qurý — barshamyzdyń qasterli paryzymyz. Osy jolda bárimiz belsendi jumys isteýimiz kerek. Qasıetti Otanymyzdy damytýdyń budan basqa joly joq. Bárimiz adal, shynshyl jáne jaýapty da bolýymyz qajet», degen edi.
