Qazaqstanda «Taza tabıǵat» ekologııalyq jobasy bastaldy
Ekologııa, geologııa jáne tabıǵı resýrstar mınıstrligi jáne oblystyq ákimdikterdiń birlesken sharasynda birneshe aımaqta aǵash otyrǵyzý, aınalany qoqystan tazartý, sý kózderin ashý aktsııalary ótti. Jalpyulttyq joba Túrkistan qalasynda bastaý alyp, Jambyl, Mańǵystaý, Qyzylorda oblystary men Shymkent qalasynda jalǵasty.
Osylaısha Prezıdenttiń orman alqaptarynda 2 mlrd, eldi mekenderde 15 mln aǵash otyrǵyzý týraly tapsyrmasyn oryndaý jumystary bastaldy. «Mekenim – jasyl elim» aktsııasyna 60 myń adam at salysyp, 486 myń túp aǵash otyrǵyzyldy. Oqýshylardyń «Meniń aǵashym» chellendjine 31 myń adam qatysyp, 39 myń kóshet egildi.
«Memleket basshysy Qasym-Jomart Toqaev halyqqa Joldaýynda qorshaǵan orta ahýalyn jaqsartý baǵytynda tapsyrmalar berdi. Jalpyulttyq ekologııalyq sharalar «Nur Otan» partııasynyń saılaýaldy baǵdarlamasynda, el Táýelsizdiginiń 30 jyldyǵy aıasynda da qarastyrylǵan. Ózge óńirlerde de osyndaı sharalar aýa raıyna baılanysty sáýirde ótedi», - dedi mınıstr Túrkistandaǵy sharadaǵy sózinde.
Mınıstr jumys saparymen kelgen Túrkistandaǵy aktsııa aıasynda qala irgesinde qurylyp jatqan «Jasyl» beldeýge kóp jyldyq aǵash kóshetteri egildi.
«Oblysymyz boıynsha 3 mln 131 myń ga orman qory jerleri bar, onyń ishinde ormanmen kómkerilgen alqaby 1 mln 630 myń gektardy quraıdy. Túrkistan irgesindegi «Jasyl» beldeý aýmaǵyn keler jylǵa deıin taǵy 3000 gektarǵa keńeıtip, tolyq aıaqtaý jospary bar. Al orman tuqymbaqtaryn damytý úshin onda ár jyly 35,0-40,0 mln. ár-túrli aǵash kóshetterin ósiremiz», - dep atap ótti oblys ákimi Ómirzaq Shókeev.
Túrkistan oblysy ákimdigi men mınıstrlik birlese qabyldaǵan keshendi josparǵa sáıkes, 2025 jylǵa deıin óńir aýmaǵynda jalpy aýmaǵy 110210 gektarǵa 170000,0 túp kóshet egilmek.
Shara barysynda ardagerlerdiń, otandyq jáne Túrkistan halyqaralyq medıaforýmyna jınalǵan túrki tildes elder BAQ ókilderiniń qatysýymen Qoja Ahmet ıAssaýı kesenesi mańyndaǵy Botanıkalyq baqqa da aǵash otyrǵyzyldy. Jańa áýejaı jolyndaǵy jemis baýyna órik egildi. Saıabaqtar, alleıalar abattandyrylyp, senbilik uıymdastyryldy.
Maǵzum Myrzaǵalıev «Taza tabıǵat» aktsııasynyń naýryz merekesinde, Túrkistanda ótkizilýiniń erekshe máni bar ekenin jáne jobany dástúrge aınaldyrý qajettigin aıtty.
«Túrki áleminiń besigi bolǵan kıeli mekenniń gúldenýi el abyroıyn arttyrady. Elbasy Nursultan Nazarbaevtyń bastamasymen kórkeıip kele jatqan qalaǵa kelgen qonaqtardyń kózi aldymen aınalanyń tazalyǵy men jasyl jelekke túsedi. Biz Naýryz meıramyn aınalany kógaldandyrý men tazartýdan bastaýdy dástúrge aınaldyrýymyz kerek. Mundaı aktsııalar halyqtyń ekologııalyq mádenıetin, tabıǵatqa janashyrlyqty arttyrady. Qazaqstanda ekologııa problemalaryna beıjaı qaramaıtyn, osyndaı sharalarǵa belsendi qatysatyn azamattar sanynyń kóbeıýi bárimizdi qýantady», - dedi mınıstr.
«Taza tabıǵat» jobasy sheńberinde joǵaryda atalǵan barlyq óńirde qoqystan tazartý maqsatyndaǵy «Birge – Taza Qazaqstan» jobasy jalǵasyn tapty. «Taza sý aıdyndary» aktsııasy aıasynda ózen-kólder jaǵasy tazartylyp, bulaq kózderi, sýarmaly sý arnalady arshyldy. Ulttyq parkter men basqa da tabıǵı aýmaqtarda «Parkter sherýi» ótti.
Eske salaıyq, keshe Memleket basshysy Qasym-Jomart Toqaev naýryz meıramymen quttyqtaýynda «Taza tabıǵat jobasynyń mańyzyn atap ótken bolatyn.
«Naýryzdyń taǵy bir belgisi – uqyptylyq pen tazalyq. Qazaq – tabıǵatqa etene jaqyn halyq. Ulystyń Uly kúni bulaqtyń kózin ashyp, aǵash egý, qorshaǵan ortany taza ustaý – erteden jalǵasyp kele jatqan dástúrimiz. Biz qolǵa alǵan «Taza tabıǵat» jobasynyń negizgi maqsaty – sol ıgi sharany jalǵastyrý»,- degen Prezıdent.
