Qazaqstanda taza kómir energııasy tyń qarqynmen damýy kerek — Qanat Bozymbaev

ASTANA. KAZINFORM — Úkimet basshysynyń orynbasary Qanat Bozymbaev kómir energııasy salasyn damytýǵa qatysty qarjylandyrý múmkindikterine pikir aıtty.

— Memleket basshysy bıylǵy Joldaýynda taza kómir generatsııasyn damytýdy tapsyrdy. Jalpy, bul salada Qytaı jaǵynda mol tájirıbe bar. Bul elde jobalardy eksportty (ózge elderdiń jobalaryn) túrde qarjylandyrýda belgili bir shekteýler bar, biraq bul negizinen memlekettik kompanııalarǵa qatysty. Osy eldiń jeke kompanııalarynda, onyń ishinde EPC-merdigerleri boıynsha, sondaı-aq jabdyqtarǵa qatysty mol tájirıbesi bar. Atap aıtqanda, olarda qarjylyq múmkindikteri de bar. Óıtkeni olar álemniń ártúrli elderinde jumys istep jatyr jáne qarjylandyrý kózderine ıe, — dedi Q. Bozymbaev elordada kommýnaldyq sektorlardy jańǵyrtý taqyrybyndaǵy forýmda tilshiler suraǵyna jaýap bere otyryp.

Sonymen qatar ol kómir energetıkasyn damytýǵa Qazaqstandaǵy damý ınstıtýttary da jumyldyrylýy múmkin ekenin aıtty. Elimizdegi damý ınstıtýttary da daıyndalyp jatyr jáne osy saladaǵy qarjylandyrýdy qarastyrady.

— Meniń oıymsha, kómir energııasy (ozyq tehnologııalar arqyly) jańa qarqynmen damýy kerek. Bul rette, Qytaıdyń da, bizdiń de qarjylandyrýdy qarastyrýǵa bolady, — dedi Úkimet basshysynyń orynbasary.

Eske salsaq, bıylǵy Joldaýda Memleket basshysy Qasym-Jomart Toqaev Qazaqstannyń sapaly kómir qory orasan ekenin, sondyqtan tabıǵatty lastamaıtynyna kepildik beretin ozyq tehnologııalardy qoldana otyryp, kómir energetıkasyn damytýǵa erekshe nazar aýdarý qajet ekenin aıtty.