Qazaqstanda táýligine qansha maska shyǵarylady
NUR-SULTAN. QazAqparat – Qazaqstanda qazirgi tańda táýligine 1 mln maska óndirilýde. Alaıda onyń ishinde sertıfıkattalǵan medıtsınalyq maskanyń úlesi – 300 myń. «SK-Farmatsııa» JShS basqarma tóraǵasy Berik Shárip osyndaı málimetti jarııa etti, dep habarlaıdy QazAqparat tilshisi.
«Buryn Qazaqstanda medıtsınalyq maskaǵa degen qajettilik - jylyna 30 mln bolsa, qazir bul suranys birneshe ese óskenin túsingen abzal. Biz jyl saıyn shamamen 15 mln maska satyp alyp kelgenbiz. Al bıyl 19,7 mln maskanyń kelisimine qol qoıyldy. Onyń ishinde 9 mıllıonyn aımaqtarǵa joldap, sondaǵy medıtsınalyq uıymdarǵa tarattyq. Maskanyń da túr-túri bar: úsh nemese tórt qabatty bolýy yqtımal. Biz maskany kepildendirilgen tegin medıtsınalyq kómektiń kólemi boıynsha jetkizemiz. Buryn medıtsınalyq preparattarǵa suranys kóp bolmaǵanymen, búgingi kúni kúrt artqan. Qazaqstanda táýligine 1 mln maska shyǵarylyp jatyr. Alaıda onyń ishinde sertıfıkattalǵan, taza medıtsınalyq maska sany – 300 myń ǵana. 300 myń maska – josparly ári boljamdy qýattylyq bolatyn», - dedi Berik Shárip Sybaılas jemqorlyqqa qarsy is-qımyl agenttiginiń Facebook paraqshasynda ótken jıynda.
Buryn Qazaqstan orta eseppen maskany shetten 18 teńgege satyp alyp kelse, qazir halyqaralyq naryqta onyń baǵasy shamamen 150 teńgege deıin qymbattaǵan.
«Bizge nelikten maska nege 118 teńge turady degen ýáj jıi aıtylady. Biz ony 106,9 teńgege satyp aldyq. Ol kezde logıstıka da toqtap qalǵan edi. Shuǵyl kerektigin eskerip, aldyrdyq. Álbette, munyń bári túpki baǵaǵa áser etpeı qoımaıdy», - dedi Berik Shárip.
