Qazaqstanda táýligine 67 myńnan astam PTR testileý júrgiziledi
«PTR testileý qýaty táýligine 67 248 zertteýge deıin artty. Juqpaly aýrýhanalarda 10 150 tósek-oryn ashyldy, onyń 22%-ynda (2 267 oryn) naýqastar jatyr, onyń ishinde 1148 oryn reanımatsııalyq bólimde ashylǵan (16%-ynda naýqastar jatyr). KVI naýqastaryna statsıonarlyq kómek kórsetýge daıyndyqty qamtamasyz etý maqsatynda kúzgi-qysqy kezeńde jańadan salynyp jatqan modýldik ınfektsııalyq aýrýhanalarda qosymsha 3 355 tósek-oryn, onyń ishinde 360 reanımatsııalyq oryn jáne basqa statsıonarlarda 38 218 (3768-reanımatsııalyq) qaıta beıindeletin bolady. Osylaısha, ınfektsııalyq tósekter sany 51 723-ke, reanımatsııalyq tósekter sany 5 276-ǵa deıin artady», - dep jazdy Asqar Mamın depýtattyq saýalǵa bergen jaýabynda.
Premerdiń aıtýynsha, ınfektsııalyq statsıonarlar úshin 91 ataýdan turatyn dárilik zattar qory quryldy, Biryńǵaı dıstrıbıýtor qoımalarynda 8,2 mlrd teńgege 60 myń adamdy emdeýge jetetin eń qajetti dárilik zattardyń eki aılyq qory qurylyp jatyr.
«Koronavırýs ınfektsııasyn úı jaǵdaıynda emdeý úshin 1,5 mlrd teńgege (1 mln adamdy qamtý jospary) 5 túrli dári-dármek (qyzýdy tómendetetin, antıkoagýlıanttar) satyp alyndy. Dárihanalarda tapshylyqty boldyrmaý maqsatynda Biryńǵaı dıstrıbıýtorǵa dárilik zattar men medıtsınalyq buıymdardy bólshek saýda jelisinde ótkizý úshin kóterme satyp alý boıynsha ókilettikter berilgen. Osyǵan baılanysty 10 mln maska, onyń ishinde 392 mln teńgege – 500 myń balalar maskasy satyp alyndy, 3,1 mlrd teńgege 33 dárilik zat alyndy. Barlyq óńirlerde suranysqa ıe dárilik zattardy satyp alý úshin 17,7 mlrd teńgege turaqtandyrý qorlary uıymdastyryldy», - dedi Premer-Mınıstr.
