Qazaqstanda táýligine 30 myń test jasalady

ALMATY. QazAqparat - Qazaqstanda pandemııa bastalǵaly beri koronavırýsqa test júrgizý kúnine 5 myńnan 30 myńǵa deıin ósti. Bul týraly Ulttyq saraptama ortalyǵynyń dırektory Arnur Nurtaev qoǵamdyq keńestiń otyrysynda aıtty dep habarlaıdy QazAqparat tilshisi.

«Qazaqstanda pandemııa bastalǵan kezde koronavırýsqa kúnine myń test jasalatyn. Qazir josparǵa sáıkes jáne pandemııanyń órshýin eskere otyryp test tapsyrýdyń qýaty artty. Qazirgi ýaqytta kúnine 30 myń adam koronavırýsqa test tapsyrady. Bastapqyda 18 zerthana bolsa, búginde 50-den astam zerthana jumys isteıdi, onyń ishinde jekemenshikter de bar», - dedi Arnur Nurtaev.

Onyń aıtýynsha, shilde aıynda zerthanalardyń qýaty táýligine 40 myń testke deıin ulǵaıady.

Sonymen qatar, ol zerthanalardyń jabylýyna sol mekemedegi qyzmetkerlerdiń C0VID-19 juqtyrýy sebep bolǵanyn tilge tıek etti.

«Zerhanada adamdar jumys isteıdi. Olar halyqty testileýden ótkizedi. Ókinishke qaraı, saqtyq sharalaryn qoldansa da, olarda vırýs juqtyrý qaýpi óte joǵary. Laboratorııa qyzmetkerleri arasynda vırýs juqtyrǵan jaǵdaılar tirkeldi. Sondyqtan dezınfektsııalyq jumys júrgizý úshin birneshe kúnge jabylady», - dedi Ulttyq saraptama ortalyǵynyń dırektory.