Qazaqstanda táýligine 1 mıllıon jumyrtqany tereń óńdeıtin kásiporyn salynady
ASTANA. KAZINFORM - Aqmola oblysynda taýyq jumyrtqasyn tereń óńdeýge arnalǵan iri ınvestıtsııalyq joba júzege asyrylyp jatyr. «Kaz Eggs» seriktestigi bastamasymen qolǵa alynǵan bolashaq óndiristik keshenniń qýaty táýligine 1 mıllıon jumyrtqa dep eseptelip otyr.
QR Aýyl sharýshalyǵy mınıstrligi baspasóz qyzmetiniń habarlaýynsha, kásiporyn Aqmola oblysy Tselınograd aýdanynyń Aqmol aýylynda ornalasady. Jalpy ınvestıtsııa kólemi 30 mlrd teńge.
Keler jyldyń IV toqsanyna josparlanǵan joba aıasynda 80 jańa jumys orny ashylmaq.
Bul otandyq óńdeý ónerkásibin damytýdaǵy mańyzdy qadam jáne qosylǵan quny joǵary ónim óndirisin arttyrýǵa jol ashady.
Qazaqstannyń agroónerkásiptik keshenindegi basym baǵyttardyń biri aýyl sharýashylyǵy shıkizatyn óńdeý baǵytyn turaqty damytý.
-Osy rette mınıstrlik zamanaýı óndiristerdi qurýǵa, otandyq ónimniń básekege qabilettiligin arttyrýǵa jáne eldiń azyq-túlik qaýipsizdigin nyǵaıtýǵa arnalǵan ınvestıtsııalyq jobalarǵa júıeli túrde qoldaý kórsetip keledi,-delingen habarlamada.
Osyǵan deıin Jambylda 60 mln jumyrtqa óndiretin kásiporyn boı kóteretini týraly jazdyq.
