Elimizde taýyq etiniń baǵasy qansha
Tutynýshylar sebetine kiretin joǵary suranysqa ıe taýardyń biri – taýyq eti. Kazinform agenttiginiń tilshisi óńirlerdegi baǵany salystyrdy.
Taýyq etiniń baǵasy ózgege qaraǵanda qoljetimdi ári kez kelgen jerden satyp alýǵa bolady. Degenmen baǵany salystyrǵan kezde qalalardaǵy qunnyń ártúrli ekenin kórýge bolady. Ol úshin kópshilik jıi tutynatyn súbe et, qanat jáne jambas etiniń baǵasyna toqtaldyq.
Súbe et
Elimiz boıynsha Almaty qalasynda taýyqtyń súbe etiniń baǵasy joǵary ekenin bildik. Munda kelisi – 4 000 teńge. Sonymen birge Shymkent, (3 400 teńge), Jezqazǵan (3 200 teńge), Óskemen men Qostanaıda (3 100 teńgeden) baǵa joǵary bolyp tur.
Al Astana, Qaraǵandy, Aqtaý, Atyraý men Kókshetaýda súbe ettiń kelisi – 3 000 teńge. Pavlodar (2 850 teńge), Taldyqorǵan (2 600 teńge), Aqtóbe men Qyzylordada (2 500 teńge) baǵa ortasha.
Elimiz boıynsha Oral qalasynda taýyqtyń súbe etiniń baǵasy – 1 800 teńge. Bul tómen baǵanyń biri. Al eń tómeni Semeı (2 100 teńge), Túrkistan (2 200 teńge) jáne Tarazda (2 300 teńge) tirkeldi.
Taýyq qanaty
Elimizde taýyq qanatynyń kelisi 1 500-3 000 teńgege satylyp jatyr. Ádettegideı eń joǵary baǵa Almaty qalasynda tirkeldi. Munda kelisi – 3 000 teńge. Sonymen birge Jezqazǵan men Shymkentte kelisi 2 800 teńgege satylady. Qaraǵandyda taýyq qanatynyń kelisi 2 600 teńge, al Astana men Pavlodarda 2 500 teńge.
Kóp óńirde baǵa 2 200 – 2 400 teńge aralyǵynda. Bul qatarda Qostanaı, Kókshetaý, Óskemen, Qyzylorda, Taraz ben Taldyqorǵan qalalary bar.
Elimiz boıynsha taýyq qanaty Túrkistanda arzan. Kelisi – 1 500 teńge. Semeı (1650 teńge) men Aqtóbede (1 850 teńge) sol shamalas.
Taýyqtyń jambas eti
Taýyqtyń ózge bóligine qaraǵanda jambas etiniń baǵasy tómen. Eń arzany Oral qalasynda satylady. Kelisi – 1 300 teńge. Al Qyzylorda, Aqtóbe men Petropavlda onyń kelisi 1 400 teńge bolyp tur.
Elimizdegi kóp óńirde jambas etiniń kelisi – 1 500-1 800 teńge aralyǵynda. Atyraý qalasynda – 1 500 teńge, Semeı men Túrkistanda – 1 550 teńge, Pavlodarda – 1 700 teńge bolsa, Shymkent men Taldyqorǵanda – 1 800 teńge.
Elimiz boıynsha eń joǵary baǵa Jezqazǵan men Qaraǵandyda tirkeldi. Munda kelisi — 2 200 teńge. Al Astana, Almaty, Aqtaýda kelisi – 2 000 teńge.
Budan elimizde taýyq etiniń baǵasy ártúrli ekenin kórýge bolady. Ásirese megapolıster men óndiristi ólkede baǵa joǵary. Al elimizdiń ońtústigi men ózge oblys ortalyqtarynda taýyq eti qoljetimdi.
Taýyq etin kópshilik jıi tutynady, soǵan qaramastan baǵa ózgelerge qaraǵanda kóp asa kóterilmeı, turaqtylyǵyn saqtaıdy.
Buǵan deıin Kazinform qazy baǵasyn salystyrdy.