Qazaqstanda «Táýelsizdiktiń men úshin mańyzy» jobasy bastaldy
Qazaqstan Respýblıkasy Táýelsizdiginiń 30 jyldyǵyn merekeleý aıasynda QR Aqparat jáne qoǵamdyq damý mınıstrligi «Táýelsizdiktiń men úshin mańyzy» jobasyn iske qosyp jatyr. Joba Táýelsizdikti qazaqstandyqtardyń jeke ómir tarıhy, sezimderi men estelikteri arqyly ár qyrynan qarastyrý maqsatynda uıymdastyrylýda.
Joba aıasynda elimizdiń turǵyndaryna táýelsiz memlekette turý degen neni bildiretini týraly óz pikirlerimen bólisýge shaqyrylady. Qazaqstandyqtar qazirgi egemendi dáýirdiń arqasynda ózderiniń jetken jetistikteri týraly, ómir tarıhtaryn aıta alady.
«Táýelsizdik – kez kelgen memlekettiń eń basty qundylyǵy. Jańa ǵasyrdyń basynda biz ata-babalarymyzdyń táýelsizdik týraly ǵasyrlyq armanyn oryndadyq. Sol kezde Qazaqstannyń Tuńǵysh Prezıdenti Nursultan Ábishuly Nazarbaev óz halqy úshin tarıhı erlik jasady. Qazaqstandyqtar úshin 30 jyl - jaı ǵana merekelik kún emes, bul – tabystyń, rýh pen bolashaqqa degen umtylystyń belgisi», - dep atap ótti Aqparat jáne qoǵamdyq damý mınıstri Aıda Balaeva.
Aıda Balaeva barlyq qazaqstandyqtardy QR AQDM bastamashylyq etken aýqymdy onlaın jobaǵa qatysýǵa shaqyrdy.
Joba qatysýshylaryna Táýelsiz Qazaqstannyń azamaty bolý neni bildiretinin aıtyp berý usynylady. Olar ózderiniń jeke jetistikteri men jeńisterimen bólise alady, sondaı-aq óz eli úshin patrıotızm men maqtanysh sezimin sezingen sátterdi eske túsire alady.
Jobaǵa qatysý úshin óz áńgimeńizdi áleýmettik jelilerdegi jeke akkaýntyńyzda #Qazaqstan30 heshtegimen uzaqtyǵy 1 mınýttan aspaıtyn beınejazba formatynda jarııalaý qajet. Sondaı-aq, beıne áńgimeni QR AQDM jobalyq keńsesiniń info@30jyl.kz. elektrondyq mekenjaıyna jiberýge bolady.
Eń áserli ári erekshe oqıǵalar, estelikter respýblıka telearnalarynyń efırinde kórstelip, sondaı-aq BAQ-ta jarııalanady.
Jobanyń barysy 30jyl.kz – Qazaqstan Táýelsizdiginiń 30 jyldyǵyna oraı qurylǵan arnaıy saıtta qadaǵalanatyn bolady.
