Qazaqstanda táýelsizdik jyldarynda sirespemen syrqattaný 7,5 esege tómendedi

ASTANA. QazAqparat - Qazaqstanda sońǵy 25 jylda vaktsınatsııalaýmen keń kólemdi qamtý sharalary nátıjesinde 14 jasqa deıingi balalar arasynda sirespemen syrqattanýdyń birde bir jaǵdaıy tirkelgen joq. Al eresekter arasynda 7,6 esege (1991 jylǵy 100 myń turǵynǵa shaqqanda 15 jaǵdaıdan 2015 jylǵy 2 jaǵdaıǵa deıin) tómendedi. Bul týraly QR Densaýlyq saqtaý jáne áleýmettik damý mınıstrliginiń baspasóz qyzmeti habarlady.

Sirespe - qozdyrǵyshy baılanys mehanızmi arqyly (otteksiz ortada ómir súretin gramm oń taıaqshalary) beriletin, ortalyq nerv júıesiniń belgili qurylymynyń zaqymdalýymen sıpattalatyn, qańqa bulshyq etteriniń qurysýy jáne tyryspa túrindegi zooantroponozdyq jiti ınfektsııalyq aýrý.

Adam sirespeniń ýytyn sezgish keledi, biraq oǵan qarsy tabıǵı ımmýnıteti bolmaıdy. Kóbinese sirespe jeńil turmystyq jaraqattanýlardan keıin paıda bolady. Syrqattanǵan adamdar ádette medıtsınalyq kómekke júginbeıdi, juqtyrýdyń negizgi sebebi kóbine tabannyń zaqymdalýyna baılanysty.

Inkýbatsııalyq kezeńi 4-14 kúndi quraıdy, keıbir jaǵdaılarda 30 kúnge deıin jetýi múmkin. Klınıkalyq aǵynnyń aýyrlyǵy ınkýbatsııalyq kezeńniń uzaqtyǵyna táýeldi bolýy múmkin, ol az bolǵan saıyn syrqattyń aýyrlyǵy kúsheıip, ólim jaǵdaılary arta túsedi.

Sirespeniń aldyn alýdyń negizgi ádisi - vaktsınalaý. Ulttyq ekpe kúntizbesine saı balalardy vaktsınalaý 2 aıdan bastap úsh rettik AKDS vaktsınasymen egiledi. Birinshi qaıta vaktsınalaý balanyń 18 aı kezinde jasalady, ári qaraı 6 jasynda, sodan keıin árbir 10 jylda ótkiziledi.  

Teri jabyny tutastyǵynyń jáne shyryshty qabyqshanyń buzylýymen jaraqattanǵandar, zaqym alǵan adamdar josparly túrde ekpe alýlary kerek.  

Ekpe egilmegen, sirespemen syrqattanǵan adamdar azapty ólimge dýshar bolady.