Qazaqstanda táýelsizdik jyldarynda qyzamyqpen syrqattaný kórsetkishi 879 eseden astam azaıdy

ASTANA. QazAqparat - Keń kólemdi vaktsınatsııalaý nátıjesinde sońǵy 25 jylda respýblıkada qyzamyqpen syrqattaný deńgeıi 879,6-dan astam esege azaıdy. 1991 jyly qyzamyqpen syrqattanýdyń 17593 jaǵdaıy tirkelse (syrqattaný kórsetkishi 100 myń turǵynǵa shaqqanda 104,68 jaǵdaı), 2015 jyly 2 jaǵdaı tirkelgen (syrqattaný kórsetkishi 100 myń turǵynǵa shaqqanda 0,01 jaǵdaı), dep habarlaıdy QR Densaýlyq saqtaý jáne áleýmettik damý mınıstrliginiń baspasóz qyzmeti.

Qyzamyq - aýrý adammen tyǵyz qatynasta bolǵanda aýa-tamshyly jolmen juǵatyn respıratorlyq vırýsty jiti ınfektsııa. Júkti áıelder úshin qyzamyq aýrýy óte qaýipti. Sebebi, qursaqtaǵy náreste 85%-ǵa deıin aýyr zaqymdanýy múmkin. Sonymen qatar, damýdyń aýytqýshylyq úshtigi túrindegi (júrektiń qolqalyq kemistigi, katarakta, sańyraýlyq) týa bitken qyzamyq sındromy týyndaıdy. Ortalyq júıke júıesiniń, mıkroftalmgenııa, gemmoragııalyq sındrom (trombotsıtopenııa nátıjesinde), zár shyǵarý jáne as qorytý júıeleri damýynyń kemistigi men qańqanyń zaqymdanýy da az kezdespeıdi. 

Vaktsınatsııalaý - qyzamyqtyń aldyn alý boıynsha birden bir tásil bolyp tabylatynyn atap aıtý kerek. Qazaqstanda halyqty atalǵan aýrýǵa qarsy ımmýnızatsııalaý eki márte júrgiziledi: 12 men 15 aı aralyǵyndaǵy jasta jáne 6 jasta. 

Qazirgi tańda quramynda qyzamyq, qyzylsha, indetti parotıttiń jeńildetilgen vırýstary bar «bir tútikshedegi» biriktirilgen vaktsına jaqsy nátıje kórsetip júr. Vaktsınalaýdan bas tartý - indetke beıim adamdardyń sanyn arttyryp, aýrý oshaǵynyń paıda bolýyna sebepker bolýy múmkin.