Qazaqstanda taýarlyq gaz tapshylyǵy týyndaýy múmkin - Prezıdent

NUR-SULTAN. QazAqparat – Elimizde taýarlyq gaz tapshylyǵy táýekeli bar. Bul týraly Úkimettiń keńeıtilgen otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Ótken jyly biz aıtarlyqtaı energııa daǵdarysyna tap boldyq. Dızel otyny, áýe kerosıni, suıytylǵan munaı gazy, elektr energııasy tapshylyǵy baıqaldy. Bul sapasyz josparlaýdyń, baqylaýdyń joqtyǵynyń jáne jekelegen tulǵalardyń aram nıetti is-áreketiniń saldarynan boldy. Búginde taýarlyq gaz tapshylyǵynyń táýekeli bar. Ótken jyly Kazakhgas oılanbastan jańa ónerkásiptik nysandardy gazǵa qosýǵa moratorıı engizdi. Sonyń saldarynan birqatar óńirde jańa, onyń ishinde joǵary tehnologııaly jáne eksportqa baǵdarlanǵan jobalardy júzege asyrýǵa qajetti gaz joq», - dedi Memleket basshysy.

QR Prezıdentiniń atap ótýinshe, elimizde taýarlyq jáne suıytylǵan gazdy qosymsha óndirýge qajetti barlyq jaǵdaı bar.

«Biraq, gazdyń teńgerimdi ári kommertsııalyq turǵyda tartymdy naryǵyn qurý máselesi sheshiler emes. Sondyqtan Energetıka mınıstrliginen naqty usynystar kútemin», - dedi Qasym-Jomart Toqaev.