Qazaqstanda taýarlyq gazdyń bólshek baǵasyna memlekettik baqylaý kúsheıtildi
ASTANA. KAZINFORM — Qazaqstanda taýarlyq gazdyń bólshek saýdadaǵy baǵasyn memlekettik retteý endi barlyq naryq sýbektilerine qoldanylady. Joǵary aýdıtorlyq palata usynymy boıynsha Kásipkerlik kodeksine tıisti ózgerister engizildi.
Qazaq Gaz Ulttyq kompanııasy, onyń enshiles uıymdary men ishki jáne syrtqy tutynýshylarǵa baǵa qalyptastyrý protsesterine júrgizilgen memlekettik aýdıt barysynda zańnamalyq olqylyq anyqtalǵan bolatyn.
— Aýdıtorlar gaz taratý kompanııalary arqyly gazdyń bólshek saýdada satylýy memlekettik baǵa retteýine jatpaıtynyn anyqtady. Zańǵa sáıkes, olardyń qyzmeti 2017 jyldyń qańtarynan keıin bastalǵan. Sonyń nátıjesinde bul uıymdarǵa «Qazaq Gaz» AQ-dan taýarlyq gazdy satyp alyp, ony qymbat baǵamen qaıta satý arqyly deldaldyq qyzmetten tabys tabý múmkindik boldy, — delingen habarlamada.
Osyǵan baılanysty biryńǵaı tásildi qamtamasyz etý maqsatynda QR Úkimetine Kásipkerlik kodeksine tıisti ózgerister men tolyqtyrýlar engizý máselesin qarastyrý usynyldy.
Nátıjesinde qajetti túzetýler engizildi. 2025 jyldyń 1 qańtarynan bastap taýarlyq gazdyń bólshek saýdadaǵy baǵasyn memlekettik retteý gaz taratý kompanııalaryn qosa alǵanda, barlyq naryq sýbektilerine qatysty bolady.
Buǵan deıin habarlanǵandaı, Parlament Májilisiniń jalpy otyrysynda Rahymjan Myrzahanuly Dildaev Joǵary aýdıtorlyq palatanyń múshesi qyzmetine taǵaıyndalǵan bolatyn.