Qazaqstanda taýarlardy tańbalaý úshin baldyq júıe bekitildi
ASTANA. KAZINFORM – Qazaqstanda taýarlardy tańbalaý jáne qadaǵalaý júıesine engizý úshin jańa irikteý ólshemderi bekitildi. Tıisti buıryqqa 2026 jylǵy 21 mamyrda QR Saýda jáne ıntegratsııa mınıstri qol qoıdy.
Qujatqa sáıkes, endi taýarlardy mindetti tańbalaýǵa engizý kezinde baldyq baǵalaý júıesi qoldanylady. Baǵalaý eki kezeń boıynsha júrgiziledi: aldymen ár ólshemge arnaıy koeffıtsıent negizinde ball beriledi, keıin barlyq upaı boıynsha qorytyndy upaı esepteledi.
Jınalǵan upaıǵa qaraı taýarlardyń deńgeıi anyqtalady:
* 45–85 ball — joǵary deńgeı;
* 15–40 ball — ortasha deńgeı;
* 0–10 ball — tómen deńgeı.
Joǵary jáne ortasha deńgeıge engen taýarlar mindetti tańbalaýǵa jatatyn ónimder tizimine engiziledi.
Qujattaǵy negizgi ólshemderdiń biri — Eýrazııalyq ekonomıkalyq odaq elderinde mindetti tańbalaýdyń bolýy. Eger taýar EAEO elderindegi tańbalanatyn ónimder tizimine engizilse nemese múshe memleketterdiń ulttyq zańnamasyna sáıkes tańbalanýǵa jatsa, bul talapqa saı dep esepteledi.
Sonymen qatar kóleńkeli ekonomıkanyń deńgeıi de eskeriledi. Ol ımport pen eksport statıstıkasyn salystyrý arqyly baǵalanady. Bul rette Ulttyq statıstıka bıýrosy men Qarjy mınıstrliginiń derekteri paıdalanylady.
Baǵalaý kezinde ónimniń aktsızdik taýarǵa jatatyny, tutynýshylyq qaptamasy men taýar japsyrmasynyń bolýy, sondaı-aq óndiristi memlekettik qoldaý sharalary da nazarǵa alynady.
Budan bólek, taýardyń qoǵamdyq, ekonomıkalyq jáne ekologııalyq qaýipsizdikke yqpaly, tańbalaý júıesin engizýdiń halyqaralyq tájirıbege sáıkestigi jáne bıznes shyǵyndary esepke alynady.
Osy talaptardyń qorytyndysy boıynsha jekelegen taýar toptaryna tańbalaý engizýdiń oryndylyǵy týraly sheshim qabyldanady.
Buıryq 2026 jylǵy 5 maýsymnan bastap kúshine enedi.
Aıta keteıik, buǵan deıin Saýda jáne ıntegratsııa mınıstrligi mindetti tańbalaýǵa jatatyn taýarlar tizbesi men ony engizý merzimderin retteıtin burynǵy qujattyń kúshin joıý týraly buıryq jobasyn qoǵamdyq talqylaýǵa shyǵarǵan edi.
