Qazaqstanda taýarlar, jumystar men qyzmetterdegi jergilikti qamtý úlesi 63 paıyzdan asty - N.Saýranbaev

ASTANA. QazAqparat - Sońǵy úsh jyl ishinde Qazaqstanda taýarlar, jumystar men qyzmetterdegi jergilikti qamtý úlesi aıtarlyqtaı ósim kórsetip otyr. Bul jaıynda búgin «Ulttyq brend-2014» jergilikti qamtýdy damytý máselelerine arnalǵan respýblıkalyq kórme-forýmda QR Indýstrııa jáne jańa tehnologııalar vıtse-mınıstri Nurlan Saýranbaev málim etti.

«Sońǵy úsh jyldyń ishinde monıtorıng nysandarynyń jalpy satyp alý kólemi 31 trln. teńgeni qurady. Onyń ishinde taýarlar, jumystar men qyzmetterdiń otandyq jetkizýshileriniń úlesi shamamen 17 trln. teńgege jýyqtady. Bul - óte úlken soma», - dedi vıtse-mınıstr.

Onyń atap ótýinshe, paıyzdyq mánde jergilikti qamtý 2010 jylǵy 48,2 paıyzdan 2013 jyly 63,3 paıyzǵa deıin ósken.

N.Saýranbaevtyń atap ótýinshe, jergilikti qamtýdy damytý jáne otandyq óndirýshilerdi qoldaý maqsatynda «jeńildik sharttary», «uzaqmerzimdi kelisimshart» syndy shamamen 100 tetik ázirlengen.