Qazaqstanda taýardy eksportqa shyǵarý jeńildedi
Sharany QR Ulttyq ekonomıka mınıstrligi uıymdastyrdy. Jıynǵa birqatar mınıstrlik ókilderi men Joǵary Sot, Ulttyq bank, Almaty ákimdigi, Azamattarǵa arnalǵan úkimet memlekettik korporatsııasy, «QTJ» UK» AQ, «Atameken» kásipkerler palatasynyń jaýapty mamandary qatysty. Jıynda baıandama jasaǵan Ulttyq ekonomıka vıtse-mınıstri Serik Jumanǵarın kásipkerlerdiń óz taýarlaryn eksporttaýyna barlyq jeńildikter jasalǵanyn aıtyp ótti.
«Taýarlardy eksportqa shyǵarý úshin barlyq protsesti elektrondy etip jatyrmyz. Buryn oǵan 5-6 kún kerek bolsa, qazir 15 mınýt ishinde deklaratsııa toltyrýǵa bolady, brokerdiń qyzmeti de kerek emes. Brokerdiń baǵasy 54 000 teńge bolatyn. Qazir kedendik baj salyqtaryn 15 mınýtta tóleýge bolady. Biz bıznes úshin barlyq jeńildikti jasap jatyrmyz. Eksportqa shyǵý úshin sertıfıkat alý jaǵyn da jeńildettik. Buryn sertfıkat jasaý úshin saraptama kerek edi, oǵan 1 aıǵa deıin ýaqyt ketetin. Qazir biz ony alyp tastadyq. Endi sertıfıkatty 1 kúnde alýǵa bolady. «Qazaqstan temir jolynda» da bir vagon jaldaý úshin birneshe kún kerek edi, qazir «QTJ» ınfrajúıe qurdy. Onda jeke kabınet ashyp, vagondarǵa aldyn ala tapsyrys berýge bolady», - dedi vıtse-mınıstr.
Mınıstr bıznesti damytý úshin aıtarlyqtaı jumystar atqarylyp jatqanyn jetkizdi.
«Bıznestiń damýy úshin reformalar jasalyp jatyr. «Reıtıng qýyp, qarapaıym bıznestiń jaǵdaıyn umyttyńyzdar» degen synı pikirdi kóp estımiz. Ol durys emes. Bıznes jasaý týraly sheshim qabyldaǵan ár adamǵa Úkimet kómsektesedi. Mysaly, mekeme ashý úshin buryn eki-úsh aı ketetin. Qazir tipti, úıden shyǵýdyń qajeti joq, jeke kompıýterińizben elektrondy úkimet arqyly jarty saǵat ishinde mekeme ashyp, bankpen shartqa otyrýǵa bolady. Qurylys jasaý úshin ruqsatnamaǵa kóp ýaqyt ketetin, biz ony da jeńildettik»,- dedi ol.
Aıta keteıik, búgingi tańda Qazaqstanda 1 540 592 shaǵyn jáne orta bıznes sýbektisi tirkelgen. Olardyń 1 145 994-i naqty kásibin dóńgeletip otyrǵandar sanatynda.
