Qazaqstanda taýar satatyn sheteldik kompanııanyń ekologııalyq jaýapkershiligi bolýy kerek- Batyrbek Áýbákirov

«Óndirýshiniń keńeıtilgen jaýapkershiligi degenimiz - elimizdiń ekologııasyn qorǵaý, óndirýshiniń shyǵarǵan taýardyń qaptamasyna jaýapkershilik alýy. Mysaly, siz tanymal kompanııanyń átirsýyn aldyńyz delik. Ony qoldanyp bolǵannan keıin qaptamasyn qoqysqa laqtyrasyz jáne ol qaptama qaıda baratynyn bilmeısiz. Osyndaı jaǵdaıda sol tanymal kompanııa Óndirýshiniń keńeıtilgen jaýapkershiligine tender ótkizip, qaptamalardy jınap alýy úshin aqsha tóleýi kerek. Osylaısha ol kompanııa Qazaqstan ekologııasynyń lastanbaýyna úles qosýy kerek», - deıdi Batyrbek Áýbákirov.

Onyń aıtýynsha, elimizdegi dúken sórelerinde turǵan taýardyń 90%-y shetelden kelgen ónimder.

«Tamaq, kıim-keshek, dári-dármek, kosmetıkanyń kóbi shetelden keledi. Onyń qaptamalary kúnderdiń bir kúninde elimizdegi qoqys polıgondaryn lastaıtyn bolady. Bul prıntsıp dúnıejúzi boıynsha jaqsy jolǵa qoıylǵan. Eger qazaqstandyq kompanııa shetelge ónimin satatyn bolsa - ónim qaptamasy úshin, ıaǵnı qoqys úshin aqsha tóleıdi», - deıdi ol.

Sondaı-aq, ol jınalǵan qoqysty qaıta óńdeý kerek ekenin aıtty.

«Eń durysy - jınalǵan qoqysty qaıta óńdeý nemese qaıta óńdeıtin elge satý. Tetra Pak shyǵaratyn zaýyt Qazaqstanda joq. Biz ony Reseıden satyp alamyz. Olar bizge satady, al paıdalanyp bolǵan soń ol qaı jerde qalatynymen sharýalary joq. Al onyń qoqysyn bizdiń memleket jınaýǵa tıisti emes, sol sebepte tender jarııalap, utyp alǵan kásipkerdiń uıymy onyń qoqysyn jınaıdy. Mysaly, Tetra Pak degen konteıner ashyp qoıyp, turǵyndar qaptamany sol konteınerge salatyndaı jaǵdaı jasap qoıady. Osylaısha Óndirýshiniń keńeıtilgen jaýapkershiligine «Aıyna osynsha, jylyna osynsha qaptama jınadyq» dep esep beredi. Osylaısha shaǵyn jáne orta bıznesti damytýǵa bolady», - deıdi ol.