Qazaqstanda taýar óndirýshiler tizilimine 13 myńnan astam ótinim tústi

ASTANA. KAZINFORM – Qazaqstandyq taýar óndirýshiler tizilimine tirkelgen kásiporyndar sany artyp keledi. 2026 jylǵy 4 aqpandaǵy jaǵdaı boıynsha «Qazaqstandyq taýar óndirýshiler tizilimi» memlekettik aqparattyq júıesine 13 242 ótinim túsken.  524 sýbektiden berilgen 3 463 ótinim qaıtaryldy, onyń ishinde 43 kompanııanyń 208 ótinimi tómen skorıngke baılanysty qabyldanbady.

Bul qorytyndy sheshim emes, anyqtalǵan kemshilikter túzetilgennen keıin kásiporyndar ótinimdi qaıta tapsyra alady.

Jalpy, búgingi tańda tizilimde 762 sýbektiden 3 393 ótinim tirkelgen. Qazirgi ýaqytta aqparattyq júıe shtattyq rejımde jumys istep, kásiporyndardan ótinimderdi qabyldaýdy jalǵastyryp jatyr.

Ónerkásip jáne qurylys mınıstrligi tizilimge qatysty túsindirý jáne keńes berý jumystaryn júrgizýde. Atap aıtqanda, kásiporyndarǵa arnalǵan qosymsha beınenusqaýlyqtar ázirlendi. Birinshi beınenusqaýlyqta jeke kabınette ótinimniń mártebesin qadaǵalaý tártibi kórsetilse, ekinshi nusqaýlyqta júıeden úzindini júkteý tártibi túsindirilgen.

Buǵan deıin Tizilimge tirkelý boıynsha qadamdyq nusqaýlyq daıyndalyp, beınenusqaýlyq Ónerkásip jáne qurylys mınıstrliginiń, sondaı-aq «QazIndustry» ortalyǵynyń resmı saıttarynda ornalastyrylǵan.

Qazaqstandyq taýar óndirýshiler tizilimine kóshý otandyq óndirýshilerdi qoldaý maqsatynda júzege asyrylyp jatqanyn eske salamyz. Jańa tsıfrlyq platforma derekterdi shoǵyrlandyrýdy qamtamasyz etip, «jalǵan óndirýshilerdi» anyqtaýǵa múmkindik beredi, rásimderdiń ashyqtyǵyn arttyryp, sybaılas jemqorlyq táýekelderin azaıtady jáne memlekettik qoldaý sharalaryna qoljetimdilikti keńeıtedi.

Budan buryn qazaqstandyq taýar óndirýshiler tiziliminde qandaı ótinimder keri qaıtarylatynyn jazǵanbyz.