Qazaqstanda taý shańǵysy kýrorttary bir aspaly jolmen baılanystyrylady

ASTANA. QazAqparat - Almaty oblysyndaǵy taý shańǵysy kýrorttary bir aspaly jolmen baılanystyrylady. Bul týraly búgin Úkimet otyrysynan keıingi baspasóz máslıhatynda Mádenıet jáne sport mınıstri Arystanbek Muhamedıuly aıtty, dep habarlaıdy QazAqparat tilshisi.

«Eń aldymen Almaty oblysynda taý shańǵy sportyn damytamyz. Qazir Shymbulaqta adam óte kóp. Onyń janynda Tabaǵan bar. Orman ertegisi degen jerden taý shańǵysyna arnalǵan taǵy bir kýrort salynyp jatyr. Talǵar aýdanynda Aqbulaq bar. Bizdiń endigi maqsatymyz - olardyń barlyǵyn bir aspaly jolmen biriktirý», - dedi mınıstr.

Onyń aıtýynsha, Almaty oblysyndaǵy taý shańǵysy kýrortyna demalýǵa kelgen adamdar jol mashaqatyn tartyp jatady. Máselen, Shymbulaqqa barý úshin búkil qalany basyp ótip, Medeýge baryp, odan keıin ǵana dittegen jerine jetedi.

«Al endi áýejaıǵa kelgen adam 10 shaqyrym jerdegi Besqaraǵaıǵa nemese Aqbulaqqa barady. Ol jerde qonaqúı, barlyǵy ornalasady. Odan keıin aspaly jolǵa otyryp Shymbulaqqa, Tabaǵanǵa bara alady. Qazir taý shańǵysy úshin Ońtústik Koreıa men Eýropadan óte kóp adam Almatyǵa keledi. Alataý bizdiń jumaǵymyz desek te bolady, áppaq qar bar, kún jarqyrap turady. Basqa elderge barsań sýyq», - dedi Arystanbek Muhamedıuly.