Qazaqstanda taý-ken salyǵynyń mólsheri ózgerdi
Memlekettik kirister komıtetiniń málimetinshe, bırjalyq metaldar boıynsha salyq 50%-ǵa (altyn, kúmis, alıýmınıı, mys, myrysh, ýran); bırjadan tys jekelegen metaldar boıynsha (temir/temir rýdasy, hrom jáne hrom rýdasy, marganets jáne temir-marganets rýdasy, platına, vanadıı, vısmýt, myshıak, volfram, palladıı, qalaıy, nıkel, tıtan, magnıı, kobalt, sýrma) 30%-ǵa ósken.
«Sondaı-aq, Memleket basshysynyń 2022 jylǵy 11 qantardaǵy taý-ken sektorynyń jańa ken oryndaryn barlaý jáne ıgerý úshin qosymsha jeńildikterdi pysyqtaý qajettigi týraly tapsyrmasy aıasynda Salyq kodeksiniń 746-babynyń 3-tarmaǵynda kózdelgen sharttardy bir mezgilde saqtaı otyryp, ónerkásiptik óndirý bastalǵan sátten bastap alpys aı ishinde paıdaly qazbalardy óndirýge salynatyn salyqtyń 0 paıyz mólsherlemesin qoldaný kózdelgen. Eger taý-ken sektorynyń ken orny (jer qoınaýyn paıdalanýǵa arnalǵan bir kelisimshart boıynsha ken oryndarynyń tobyna, ken ornynyń bir bóligine) rentabeldilik deńgeıi 5 paıyz jáne odan az bolsa, QR Úkimeti aıqyndaǵan ólshemsharttarǵa sáıkes kelse, 2022 jylǵy 31 jeltoqsandaǵy jaǵdaımen Salyq kodeksinde belgilengen paıdaly qazbalardy óndirýge salynatyn salyq stavkalaryn qoldaný quqyǵy berildi», - dep jazdy vedomstvodan.
Salyq kodeksiniń 745-baby 6-tarmaǵyna mıneraldyq shıkizatty satý tolyq bolmaǵan kezde ken ornynda esepten shyǵarylǵan qorlar quramynan alynatyndaryn (ysyraptardy qaıtarý) qospaǵanda, paıdaly qazbalary bar mıneraldyq shıkizattyń qunyn aıqyndaý maqsatynda ózgerister engizildi.
